Túrkııada áıelder erlerden 5 jylǵa uzaǵyraq ómir súredi

ASTANA. KAZINFORM — Túrkııada ómir súrý uzaqtyǵy artyp keledi. Túrkııa statıstıka ınstıtýty (TÜİK) 2022-2024 jyldarǵa arnalǵan esebin jarııalady, dep habarlaıdy Anadoly agenttigi. 

Málimetterge súıensek, elde ortasha ómir súrý uzaqtyǵy 78,1 jasty quraıdy. Bul kórsetkish ótken jyldarmen salystyrǵanda artqan.

Áıelderdiń ómir súrý uzaqtyǵy 80,7 jas bolsa, erler úshin 75,5 jas. Bul túrik áıelderiniń erlerge qaraǵanda orta eseppen 5,2 jylǵa uzaǵyraq ómir súretinin bildiredi.
Taǵy bir mańyzdy kórsetkish — bilim deńgeıi men ómir súrý uzaqtyǵy arasyndaǵy baılanys. Esepke sáıkes, joǵary bilimi bar 30 jastaǵy adamdar orta bilimi barlarǵa qaraǵanda shamamen 5 jyl uzaq ómir súredi.

Salaýatty ómir súrý uzaqtyǵy ortasha eseppen 57,6 jasty quraıdy. Bir qyzyǵy, bul kórsetkish boıynsha, erler (58,9 jas) áıelderden (56,3 jas) sál asyp túsedi.
Sondaı-aq, 65 jasqa tolǵan adamdar ortasha eseppen taǵy 18 jyl ómir súredi degen boljam bar.

Túrkııanyń densaýlyq saqtaý júıesindegi reformalar, medıtsınalyq qyzmet sapasyn arttyrýǵa baǵyttalǵan sharalar, dene belsendiligin arttyrý bul ósimge oń áser etýde.

Eske sala keteıik, Japonııa áıelderdiń ómir súrý uzaqtyǵy boıynsha taǵy rekord ornatty.