Túrkııada aıaq kıim óndirisi úsh jylda 41,6 paıyzǵa azaıdy
ASTANA. KAZINFORM — Sońǵy jyldary Túrkııada birqatar taýarlardyń óndiris kóleminde ózgeris baıqalyp otyr, dep habarlaıdy Kazinform agenttiginiń Ankaradaǵy menshikti tilshisi.
Túrkııa Statıstıka ınstıtýtynyń (TÜİK) Inflıatsııaǵa qarsy kúres baǵdarlamasy iske asyrylyp otyrǵan 2023-2025 jyldarǵa zertteý júrgizgen. Zertteý derekterine sáıkes, 18 salanyń 11-inde óndiris kólemi qysqarǵan. Eń qıyn jaǵdaı aıaq kıim óndirisinde baıqalady, túrik sheberleri sońǵy úsh jylda ónim kólemin 41,6%-ǵa azaıtqan.
Órik óndirisi de aıtarlyqtaı qysqarǵan — 21,9%. Sondaı-aq gaz jáne qatty otyn jaǵylatyn peshterdiń óndirisi 18,3%-ǵa, tońazytqysh óndirisi 16,6%-ǵa, tazartylǵan fýndýk óndirý 12,9%-ǵa azaıǵan. Shaı óndirý kólemi de shamamen 10% qysqarǵan.
Zertteý júrgizilgen 18 salanyń jeteýinde óndiris kólemi ulǵaıǵan. Eń joǵary ósim farmatsevtıka ónerkásibinde baıqalady: 2023 jyly Túrkııanyń farmatsevtıka kompanııalary jalpy quny 19,6 mlrd lıraǵa dári-dármek shyǵarsa, 2025 jyly bul kórsetkish 39 mlrd lıraǵa ósken. Osy orynda dári-dármek jónindegi derekter aqshalaı eseptelgendikten, óndiris kóleminiń ósýine baǵanyń ózgerýi yqpal etkenin aıta ketken jón. Sondaı-aq satylymǵa jańa dárilerdiń shyǵýy, keı preparattardy óndirý kóleminiń ulǵaıýy da farmatsevtıka ónerkásibiniń ósýine septigin tıgizgen.
Jýǵysh zattar óndirisi osy kezeńde 64,2%-ǵa ósti. Sarapshylar bul ósimdi Eýropadaǵy óndiris shyǵyndarynyń ósýine baılanysty álemdik brendterge túsetin tapsyrystardyń bir bóligi Túrkııaǵa aýysýymen, sondaı-aq óndiris kólemin arttyrýǵa jáne jańa tehnologııalarǵa salynǵan ınvestıtsııalarmen baılanystyryp otyr.
Daıyn beton qospasynyń óndirisi shamamen 19%-ǵa artty. Temeki, portlandtsement, kilem jáne kólik óndirisi de ósim kórsetti. Sonymen qatar, avtomobıl ónerkásibi shamamen 1%-ǵa óskenin aıta keteıik.
Eske sala keteıik, Túrkııada kún jáne jel energetıkasynyń elektr energııasyn óndirýdegi úlesi aıtarlyqtaı óskenin habarlaǵan edik.
Nurlan Tuıaqov
