Túrkııada avtobýs órtenip, bes adam qaza tapty

NUR-SULTAN. QazAqparat – Túrkııanyń soltústik batysyndaǵy Balykesır provıntsııasynda jolaýshylar avtobýsy órtenip, kem degende bes adam mert boldy, dep habarlaıdy Hurriyet gazeti.

Basylymnyń derekterine qaraǵanda, avtobýs órtengen kezde onyń ishinde 37 adam bolǵan. Barlyq zardap shekkender shuǵyl aýrýhanaǵa jatqyzyldy. Avtobýs júrgizýshisi ustaldy.

«Salonda kofemashına jana bastaǵan shaqta júrgizýshi toqtap, jolaýshylardyń avtobýstan asyqpaı túsýlerin suraǵan», - degen provıntsııa meriniń sózin keltiredi basylym.

Qatty úreılengen adamdar birin-biri janyshtaı, syǵylysa syrtqa umtylǵan.

Aldyn ala boljam boıynsha, bes adamnyń ólimi gazǵa ýlaný saldarynan bolǵan.