Túrkııada aýsyldyń taralýy: Ylǵyndaǵy mal bazary jabylyp, karantın engizildi

ASTANA. KAZINFORM – Túrkııanyń Konıa provıntsııasynda aýyl sharýashylyǵy janýarlary arasynda aýsyldyń taralýy tirkeldi, dep habarlaıdy Kazinform menshikti tilshisi.

Konıa provıntsııasynyń Ylǵyn aýdanynda bılik ókilderi qaýiptiń aldyn alý maqsatynda jedel áreket etip, jabyq mal bazaryn arnaıy buıryq shyqqanǵa deıin dereý jabý týraly sheshim qabyldady.

Mýnıtsıpalıtettiń resmı málimdemesine sáıkes, qabyldanǵan sharalar aýrýdyń odan ári taralýyn boldyrmaýǵa jáne janýarlar men halyqtyń densaýlyǵyn qorǵaýǵa baǵyttalǵan.

Bazardy jabýmen qatar, aýdan aýmaǵynda maldyń qozǵalysyna shekteý qoıyldy. Veterınarlyq qyzmet mamandary barlyq sharýa qojalyqtaryn tekserip, qajetti sanıtarlyq sharalardy júrgizýdi bastady.

Bılik ókilderi azamattardy asa muqııat bolýǵa, sanıtarlyq talaptardy saqtaýǵa jáne karantındik usynystardy qatań oryndaýǵa shaqyrady. Shekteýlerdi buzý epıdemıologııalyq jaǵdaıdyń nasharlaýyna jáne agrarlyq sektor úshin ekonomıkalyq shyǵyndarǵa ákelýi múmkin. Qazirgi tańda óńirdegi jaǵdaı baqylaýda tur.

Aıta keteıik, aýsyl – qos tuıaqty janýarlar arasynda tez taralatyn jiti vırýstyq aýrý. Ol asa juqpaly bolyp keledi jáne mal sharýashylyǵynda eleýli shyǵynǵa soqtyrýy múmkin, sondyqtan aýrýdyń taralýyna qarsy kúres shuǵyl ári batyl áreketterdi talap etedi.

Buǵan deıin Túrkııa shekarada qaýipsizdik sharalaryn kúsheıtkeni habarlanǵan bolatyn.