Túrkııada aýrýhanadan órt shyǵyp, 10 adam mert boldy

GAZIANTEP. Anadoly-QazAqparat - Túrkııanyń ońtústiginde ornalasqan Gazıantep qalasynda aýrýhanadaǵy ottegi apparaty isten shyǵyp, onyń sońy órtke ulasqan. Saldarynan 10 adam kóz jumdy, dep habarlaıdy QazAqparat Anadoly agenttigine silteme jasap.

Qyzyl jalyn Gazıantep qalasynyń ýnıversıtet gospıtalindegi koronavırýs syrqattaryn emdeıtin ıntensıvti terapııa bóliminen shyqqan. Oqıǵa ornynan 8 adamnyń denesi tabyldy.

Keıinnen Túrkııanyń densaýlyq saqtaý mınıstri Fahrettın Qoja óziniń Twitter paraqshasynda órtten qaza tapqandar sany 10-ǵa jetkenin jazdy.

Aýrýhanada em alyp jatqan patsıentter basqa medıtsına mekemelerine aýystyrylǵan.

Tilsiz jaý az ýaqyttyń ishinde aýyzdyqtaldy.

Polıtsııa oqıǵanyń mán-jaıyn anyqtaý úshin tergeý júrgizip jatyr.