Túrkııada aýla sypyrýshy jetinshi qabattan qulaǵan balany qutqardy
ASTANA. QazAqparat - Túrkııada aýla sypyrýshy turǵyn úıdiń jetinshi qabatyndaǵy terezeden qulaǵan tórt jasar qyzdy qutqaryp qaldy. Ol joǵarydan quldılap kele jatqan búldirshindi qaǵyp alǵan, dep habarlady túriktiń Dogan aqparattyq agenttigi.
Keleńsiz jaǵdaı 28 qarashada eldiń batysyndaǵy Eskıshehır qalasynda bolǵan. Shýkrıý Denız tap janyna aspannan balanyń aıaq kıimi túsken shaqta úılerdiń biriniń mańynda kóshe sypyryp jatqan. Ol joǵary qaraǵan kezde ashyq terezeniń jaqtaýynda oınap otyrǵan qyzdy kórgen. Balanyń qulamaýy múmkin emestigin sezgen aýla sypyrýshy tótenshe jaǵdaıǵa oraı shalt sheshim qabyldady.
«Ol tereze jaqtaýynda tura almaı, qulap ketti. Men ony aýada ustap qalýǵa tyrystym. Qyz qulaǵan soń qatty jylady. Biraq esinen tanǵan joq. Men esh jerim jaraqattanbaǵanymen qatty shoshynyp, birneshe mınýt boıy aıaǵyma tura almadym, dep moıyndady Denız.
Zardap shekken búldirshin aýrýhanaǵa jiberildi. Arada bir táýlik ótken soń onyń týystary jaǵdaıy jaqsarǵanyn habarlaǵan. Búgin, 30 qarashada sábı úıine oralady.
Túrik aýla sypyrýshysynyń bul qadamy eldiń áleýmettik jelisinde qyzý talqylanýda. Denız óz otanynda batyrǵa aınaldy.
