Túrkııada áýejaıdaǵy ushaqtan tútin shyqty

ASTANA. KAZINFORM — Ystanbuldan Antalııaǵa ushyp kelgen Turkish Airlines ushaǵy ushý-qoný jolaǵynda tútindeı bastaǵan soń, jolaýshylar dereý evakýatsııalandy, dep habarlaıdy Milliyet.  

Áleýmettik jelide áýejaıdaǵy jaǵdaıdyń vıdeosy tarap ketti. Boeing 777 ushaǵy Antalııa áýejaıyna qonǵannan keıin shassıinen tútin shyǵa bastaǵan.

Áýe kompanııasynyń málimdeýinshk, jolaýshylarǵa qaýip tónip turǵan joq, biraq saqtyq sharasy retinde ushaqtan evakýatsııalanǵan.

— Jolaýshylarymyz der kezinde qaýipsiz jerge kóshirildi, zardap shekkender joq. Ókiletti mamandar ushaqty tehnıkalyq tekserýge kiristi. Bastapqy tekserýler tútinniń gıdravlıkalyq qubyrdaǵy tehnıkalyq aqaýdan shyqqanyn anyqtady, — delingen Turkish Airlines habarlamasynda.

Ushaqtaǵy 247 jolaýshy men 13 ekıpaj múshesi evakýatsııalandy. Túrkııanyń kólik mınıstrligi oqıǵanyń mán-jaıyn anyqtaýǵa kiristi.

Eske sala keteıik, Túrkııada 16 adam mingen kater órtke orandy.