Túrkııada Astananyń 20 jyldyǵyna arnalǵan kontsert ótti
ASTANA. QazAqparat - «Bolashaqqa baǵdar: rýhanı jańǵyrý» baǵdarlamasy aıasynda Astana qalasynyń 20 jyldyǵyna oraı Ankara qalasynda Qazaqstannyń Túrkııadaǵy elshiliginiń uıymdastyrýymen «Astananyń 20 jyldyǵy» kontserti ótti, dep habarlaıdy QR Syrtqy ister mınıstrliginiń baspasóz qyzmeti.
Túrkııanyń memlekettik teleradıokorporatsııasyna qarasty TRT stýdıo-zalynda tikeleı efırde júzege asqan kontserttik baǵdarlamaǵa Qazaqstannyń Túrkııadaǵy elshisi Abzal Saparbekuly, Túrkııa Respýblıkasy Prezıdentiniń Bas keńesshisi ıAlchyn Topchý, dıplomatııalyq mekemelerdiń, isker toptardyń ókilderi jáne zııaly qaýym men jergilikti halyq qatysty.
Dına Nurpeıisova atyndaǵy Halyqtyq mýzyka akademııasy orkestri óner kórsetken saltanatty sharanyń ashylýynda sóz sóılegen elshi A.Saparbekuly atalǵan kontserttik baǵdarlamanyń elordamyz Astananyń 20 jyldyǵyna tartý etilip otyrǵanyn, sondaı-aq Astana men Ankaranyń qalyptasý tarıhynda uqsastyqtardyń bar ekendigin atap ótip, dáıekti derekter keltirdi. Elimizdiń ónerin tanystyryp, abyroıyn asqaqtatqan osyndaı ıgi sharanyń ótýine atsalysqan TRT Bas dırektsııasyna jáne Dına Nurpeıisova atyndaǵy Halyq mýzyka akademııasy orkestriniń ónerpazdaryna alǵys bildirdi.
Kontserttik baǵdarlama Qazaqstannyń halyq artısi, kompozıtor Eskendir Hasanǵalıevtiń «Janarym» shyǵarmasymen bastalyp, qazaq ulttyq mýzykasynyń sımvoldary - Qurmanǵazy, Dına Nurpeıisova, Seıilhan Qısanov jáne t.b. belgili kompozıtorlardyń týyndalyrymen jalǵasyn tapty.
Ulttyq kompozıtsııalarmen qatar álemdik klassıkalyq mýzyka da oryndaldy. Uly dala eliniń mýzykalyq sálemdemesin jetkizgen ónerpazdar kórermender tarapynan ystyq yqylas pen qoshemetke ıe boldy.
Baǵdarlamada sóz sóılegen ıA.Topchý tili, dini, tarıhy bir dostas elderdiń Prezıdentteri arasyndaǵy qarym-qatynasty aıryqsha atap ótti. Túrki áleminiń aqsaqaly Nursultan Nazarbaevtyń parasatty saıasatyn atap ótip, Qazaqstannnyń damýynyń jáne túrkitildes elderdiń qarym-qatynasynyń nyǵaıýynyń kepili- N. Nazarbaev ekenin basa aıtty.
Kontserttik baǵdarlamany «TRT Avaz» telearnasynyń tikeleı efıri arqyly 350 mıllıon kórermen tamashalaýǵa múmkindik aldy.
