Túrkııada áskerı operatsııa barysynda 53 lańkestiń kózi joıyldy
ASTANA. QazAqparat - Túrkııada terrorlyq uıymdarǵa qarsy áskerı operatsııa júrgizilip jatyr, dep habarlaıdy Habar 24 telearnasy.
Túrik qarýly kúshteri, jandarm men polıtsııanyń arnaıy jasaǵy jumyldyrylǵan keń aýqymdy sharada apta ishinde 53 lańkestiń kózi joıylyp, 13-i ustalǵan. Bul derekti osy eldiń Іshki ister mınıstrligi taratty.
Vedomstvanyń resmı aqparatyna súıensek, operatsııa aıasynda «Irak jáne Levant uıymy», FETO jáne kúrd sodyrlaryna qatysy bar degen kúdikpen myńnan asa adam ustalǵan. Sondaı-aq kúshtik qurylymdar qoldan jasalǵan 65 bomba, 2 tonna jarylǵysh zat pen 77 qarý tárkilegen.
Esterińizge salamyz, byltyr Túrkııada júzdegen adamnyń ómirin jalmaǵan 28 iri terrorlyq oqıǵa tirkeldi. Lańkestik shabýyl kóbine Túrkııanyń eń iri shahary Ystanbul men kúrdter tyǵyz shoǵyrlanǵan eldiń shyǵys aımaǵyndaǵy Dııarbaqyr provıntsııasynda bolǵan. Bul terrorlyq aktilerdi TGIL men «Kúrdistan jumysshy partııasy» óz moınyna aldy.
