Túrkııada ashylmaǵan qylmystardy qaıta qaraıtyn jańa bólim qurylady
ASTANA. KAZINFORM - Túrkııanyń Ádilet mınıstrligi ashylmaı qalǵan qylmystardy qaıta zerdeleýge baǵyttalǵan reformany qolǵa aldy. Bul týraly Kazinform agenttiginiń Ankaradaǵy menshikti tilshisi habarlady.
Vedomstvo tergeý sapasyn arttyryp, sot júıesiniń jumysyn kúsheıtý úshin jeti jańa mamandandyrylǵan qurylym jasaqtaıtynyn málimdedi. Sonyń ishinde sońǵy jıyrma jylda sheshimin tappaı qalǵan isterdi qaıta qarap, ilgeriletýmen aınalysatyn arnaıy basqarma qurylady.
Ádilet mınıstri Aqyn Gúrlek jańa bólimderdiń qyzmet aıasy keń bolatynyn aıtty.
Onyń sózinshe, olar terrorızm men uıymdasqan qylmysqa qarsy is-qımyldan bastap, tsıfrlyq quqyqbuzýshylyqtar, qarjy salasyndaǵy qylmystar jáne tótenshe jaǵdaılardyń saldaryn zertteýge deıingi baǵyttardy qamtıdy. Sonymen qatar sot saraptamasy, qoǵamdyq qaýipsizdik jáne kıberqaýipsizdik boıynsha jeke baǵyttar qarastyrylǵan.
Reforma aıasynda kópten beri ashylmaı kele jatqan isterge basymdyq beriledi. Qazirdiń ózinde 2006–2026 jyldar aralyǵyndaǵy 122 kisi óltirý faktisi qaıta qaralyp jatyr. Olardyń ishinde áli ashylmaǵan, buryn toqtatylǵan nemese tergeýi jalǵasyp jatqan ister bar.
Resmı derekke sáıkes, osy kezeńde 278 adam óltirý deregi ashylmaǵan kúıinde qalǵan.
Tergeý barysynda qoǵamda úlken rezonans týdyrǵan isterge, ásirese áıelder men balalarǵa qatysty qylmystarǵa erekshe mán berilip otyr. Solardyń biri – stýdent Gúlıstan Dokýdyń joǵalyp ketýi. Bul is qaıta qozǵalyp, qazir oqıǵanyń mán-jaıyn anyqtaý jumystary júrgizilip jatyr. Іs boıynsha 15 adam ustalyp, 11-i qamaýǵa alynǵan.
Budan bólek, Gıresýn provıntsııasynda kóz jumǵan 11 jastaǵy Rabııa Naz Vatannyń ólimi de qaıta tekserilý ústinde. Bul iste parlamenttik tergeý materıaldary paıdalanylmaq. Sondaı-aq Van provıntsııasynda joǵalyp, keıin máıiti tabylǵan 21 jastaǵy stýdent Rojın Kabaıyshqa qatysty is te qaıta qaralyp jatyr.
Bılik bul bastama sot júıesiniń ashyqtyǵyn arttyryp, onyń tıimdiligin kúsheıtýge baǵyttalǵanyn atap ótti. Al eski isterdi qaıta tergeý qoǵam senimin nyǵaıtýdyń mańyzdy qadamy retinde baǵalanyp otyr.
Aıta keteıik, osyǵan deıin Túrkııada áleýmettik jelide mektepterge shabýyl jasaımyz dep qorqytqandarǵa qatysty tergeý bastalǵany týraly jazdyq.
