Túrkııada alǵash ret ushaq toqtamaı oryndarynan turǵan jolaýshylarǵa aıyppul salyndy

ASTANA. KAZINFORM – Pegasus Airlines áýe kompanııasynyń Sofııa–Ystanbul baǵytyndaǵy PC272 reısinde tártip buzǵan birneshe jolaýshy alǵash ret ákimshilik jaýapkershilikke tartyldy.

HavaSosyalMedya avıatsııalyq agenttiginiń habarlaýynsha, Boeing 737-800 ushaǵy Sabıha Gókchen áýejaıyna qonǵan soń, áýe kemesi tolyq toqtamaǵanyna qaramastan birneshe jolaýshy oryndarynan turyp, júk sórelerinen zattaryn ala bastaǵan. Bortserikter qaýipsizdik talaptaryn saqtaýǵa shaqyryp, oryndaryna otyrýdy talap etken. Alaıda keıbir jolaýshylar eskertýlerge baǵynbaǵan.

Saldarynan bortqa polıtsııa shaqyrylyp, áýejaıda quqyq buzýshylarǵa qatysty ákimshilik hattamalar toltyrylyp, aıyppul salyndy.

Túrkııada 2024 jyldan bastap engizilgen jańa erejelerge sáıkes, ushaq tolyq toqtamaı turyp ornynan turý, bagaj bóligin ashý nemese ekıpajdyń nusqaýlaryn elemeý – ákimshilik quqyqbuzýshylyq bolyp sanalady. Bul talaptar ishki jáne halyqaralyq reısterge birdeı qoldanylady.

Túrkııanyń Azamattyq avıatsııa jónindegi bas dırektsııasynyń dereginshe, mundaı tártip buzýshylyq úshin jolaýshylarǵa 2 603 túrik lırasyna deıin (shamamen 35 myń teńge) aıyppul salynady.

Budan bólek, áýe kompanııalary quqyq buzýshylardy «qara tizimge» engizip, bolashaqta reısterge bılet satyp alýyna shekteý qoıa alady.

Eske sala keteıik, buǵan deıin túrik avıakompanııalary jolaýshylardyń erte turýyna baılanysty aıyppul júıesin engizetini týraly habarlanǵan bolatyn. Bul tájirıbe endi naqty júzege asyryla bastady.

Aıta keteıik, Túrkııada áýejaıdaǵy ushaqtan tútin shyqty.