Túrkııada áleýmettik jelilerge qatysty talap kúsheıip jatyr

ASTANA. KAZINFORM – Túrkııada áleýmettik jelilerge kirý úshin jeke adamnyń verıfıkatsııadan ótýin mindetteýdi josparlap otyr, dep habarlaıdy Kazinform agenttiginiń Ankaradaǵy menshikti tilshisi.

Túrkııanyń Ádilet mınıstri Akyn Gıýrlek áleýmettik jelilerge kirý úshin paıdalanýshylardy jeke basyn jáne uıaly telefon nómirin rastaýǵa mindetteıtin zań jobasy ázirlenip jatqanyn málimdedi.

Sondaı-aq bılik 15 jasqa tolmaǵan balalardyń áleýmettik jelilerge kirýine tyıym salýdy josparlap otyr.

Vedomstvo málimetinshe, bul qujat bıyl qabyldanbaq. Túrkııa Ádilet mınıstrliginiń bastamasyna sáıkes, áleýmettik jelilerde akkaýnttardy tirkeý men oǵan kirý úshin jeke adam mindetti túrde sáıkestendirý men uıaly telefon nómirin rastaý qajet bolady. 

Gıýrlek bul shara ata-analar tarapynan keń qoldaý tapqanyn atap ótti.

– Azamattar tarapynan úlken suranys pen tolyq qoldaýdy kórip otyrmyz, – dedi mınıstr.
Túrkııa mınıstri TV100 telearnasyna bergen suhbatynda «Alo Adalet» («Allo, ádilet») qosymshasynyń iske qosylǵanyn da habarlady.

Onyń aıtýynsha, qosymshanyń negizgi maqsaty – sot isterin qaraý merzimderin qysqartý jáne protsesterdiń ashyqtyǵyn kóterý.

Qosymsha arqyly azamattar óz isteriniń qaralýyndaǵy kidiristerdiń sebepterin anyqtap, sot protsesiniń barysy týraly aqparat alady. Bul jańashyldyq sýdıalarǵa isterdi qaraýdyń belgilengen merzimderin oryndaýǵa kómektesedi

Aıta keteıik, buǵan deıin Túrkııada kıberqylmyspen kúres kúsheıgenin jazǵan edik.

Arýjan Jánádil