Túrkııada áleýmettik jelide mektepterge shabýyl jasaımyz dep qorqytqandarǵa qatysty tergeý bastaldy
ASTANA. KAZINFORM — Túrkııanyń Kahramanmarash jáne Shanlyýrfa provıntsııalaryndaǵy bilim berý mekemelerine jasalǵan qarýly shabýyldardan keıin eldiń quqyq qorǵaý organdary áleýmettik jelilerde qorqytý habarlamalaryn taratqan tulǵalarǵa qatysty tergeý amaldaryn bastady, dep habarlaıdy Kazinform agenttiginiń Ankaradaǵy menshikti tilshisi.
Ystanbulda prokýratýra bilim berý mekemelerine jaqynda jasalǵan shabýyldardan keıin áleýmettik jelilerde qorqytý habarlaryn jarııalady degen kúdikke ilingen 25 adamdy qamaýǵa alý orderin bshyǵardy.
Vedomstvonyń resmı málimdemesine sáıkes, Ystanbul polıtsııa basqarmasy kıberqylmyspen kúres bóliminiń mamandary «mektep shabýyldary» týraly qorqytatyn kontent taratqan akkaýnttardy taldady. Tekserý qorytyndysy boıynsha tıisti esepter daıyndalyp, sonyń negizinde qylmystyq tergeý bastaldy.
Kúdiktilerge «qorqytý arqyly halyq arasynda qorqynysh pen úreı týdyrý» jáne «qoǵamda hshpendilik pen alaýyzdyq týdyrýmen» baılanysty aıyptar taǵyldy.
Atap ótilgendeı, is boıynsha 25 aıyptalýshynyń 13-i — kámeletke tolmaǵandar. Bul rette 20 kúdikti Ystanbuldan tys jerde júr jáne olarǵa qatysty aımaqtyq bólimshelerdiń qatysýymen úılestirilgen sharalar júrgizilip otyr.
Tergeý amaldary jalǵasyp keledi. Túrkııa bıligi ásirese qoǵamdyq qaýipsizdikke tónetin qaterlerdi eskere otyryp, qaýipti kontenttiń ınternette taralýyna qarsy kúrestiń mańyzdylyǵyn atap ótti.
Eske salsaq, Túrkııa mektebindegi shabýyldan keıin kúdiktiler ustalyp, júzge jýyq akkaýnt buǵattaldy.
