Túrkııada áleýmettik jeli paıdalanýshylary Islambek Qýatty ulttyq batyrlaryna teńep jatyr
ASTANA. QazAqparat - 2016 jylǵy Eýropa chempıonatynyń toptyq irikteý týrnıri aıasynda fýtboldan Qazaqstan men Latvııa quramalary kezdesip, jerlesterimiz 1:0 esebimen jeńiske jetkeni málim. Bul jeńis Túrkııa quramasyna da qosymsha upaı syılap, olar «Eýropa chempıonaty-2016» dodasynyń pleı-off kezeńine joldama alǵan bolatyn.
Óz kezeginde Túrkııa quramasy irikteý týrnıriniń sońǵy oıynynda Islandııa quramasyn 1-0 esebimen jeńip, úzdik úsh komandanyń sońǵysy retinde (Islandııa men Chehııadan keıin) Eýropa chempıonatynda oınaý quqyǵyn alǵan-dy. Olar «A» tobynda 18 upaı oljalan bolatyn.
Bul eldiń quramasy óz tarıhynda tórtinshi márte Eýropa chempıonatynyń fınaldyq kezeńine joldama alyp otyr, buǵan deıin 1996, 2000 jáne 2008 jyldary óz tobynan shyqqan edi.
Jankúıerler óz eliniń quramasynyń fınaldyq kezeńge shyǵýyna sebepker bolǵan Islambek Qýatqa sheksiz rıza bolǵany sonshalyq, oǵan «Túrkııanyń ulttyq batyry» ataǵyn berý týraly usynystar bildirgen. Al áleýmettik jeli paıdalanýshylary sezimge toly rızashylyqtaryn joldaǵan.
Islambek Qýattyń bul goly ony Túrkııada tanymal etip jiberdi. Tek «Gýgl» izdeýshi júıesinde onyń esimi 1 mln. 200 myń ret terilgen.
Bul elde depýtattar da ulttyq quramanyń jankúıerleri bolyp tabylady. Osy oraıda Túrkııa Parlamentiniń depýtattary alǵys bildirýdi jón dep tapqan. Sol sebeppen qazirgi bıleýshi Damý jáne ádildik partııasynyń depýtaty Mahmýt Mally Túrkııadaǵy Qazaqstan Elshiligine arnaıy baryp, elshi Janseıit Túımebaevpen kezdesti.
Elshilik arqyly depýtat Islambek Qýatqa alǵys hat jáne «Beshıktash» komandasynyń formasyn estelik retinde joldady. Bul syılyq qazaqstandyq fýtbolshy úshin qaıtalanbas qurmet bolyp sanalady, sebebi ol óziniń suhbattarynyń birinde súıikti komandalarynyń biri retinde túriktiń dál osy «Beshıktash» komandasyn atap ótken.
