Túrkııada alaıaqtar týrısterdiń kartalarynan 30 mln dollarǵa jýyq qarjy urlady

ASTANA. KAZINFORM – Aıdyn provıntsııasynda túrkııalyq jandarmerııa sheteldik týrısterdiń bank kartalarynan aqsha urlaý fakisine qatysty uıymdasqan toptyń 20 múshesin ustady.

Bul týraly Ege Telgraf basylymy jazdy, dep habarlaıdy Kazinform menshikti tilshisi.

Basylymnyń habarlaýynsha, zańsyz áreketten kelgen shyǵyn 1 mlrd 150 mln túrik lırin qurady ($29,2 mln). Keminde 268 adam alaıaqtardyń qurbanyna aınaldy.

Uıymdasqan top múshelerin ustaý operatsııasy Túrkııanyń Antalıa, Izmır, Ystanbul sııaqty birneshe qalasynda ótti.

Tergeý málimetteri boıynsha, uıymdasqan toptyń qyzmetin Egeı teńiziniń jaǵalaýynda ornalasqan kýrortty Kýshadasy qalasyndaǵy qonaqúılerdiń biriniń ıesi úılestirip otyrǵan.

Naqtyraq aıqanda, quqyq qorǵaý organdarynyń ókilderi Kýshadasy qalasynyń qonaqúılerinen POS-termınaldardyń kómegimen jasalǵan kúdikti operatsııalardy anyqtap, 4 aı boıy alaıaqtardyń áreketin baqylap otyrǵan.

Belgili bolǵanyndaı, týrısterdiń bank kartalarynan alynǵan málimetterdi qylmyskerler ózge qonaqúıler men kólikti jalǵa berý oryndaryna aıtyp otyrǵan.

Qarjynyń bank kartasynan zańsyz shyǵarylǵanyn týrıster eline qaıtyp oralǵan soń ǵana bilgen. Zardap shekkenderdiń ulty týraly eshteńe aıtylmaǵan.

Osyǵan deıin Túrkııada qatty sý tasqyny saldarynan bir adam joǵalǵany týraly jazdyq.