Túrkııada 9 aıda quny 32,6 mlrd lır bolatyn kontrabandalyq taýar tárkilengen
ASTANA. KAZINFORM – Bıylǵy jyldyń 9 aıynda Túrkııanyń Saýda mınıstrligi keden qyzmetiniń ókilderi sátti operatsııalar júrgizip, quny 32,6 mlrd lır bolatyn kontrabandalyq taýarǵa tosqaýyl qoıdy.
Vedomstvonyń habarlaýynsha, atalǵan is-sharalar kontrabandanyń kóptegen túrlerine qarsy baǵyttaldy. Kontrabandashylar shekaradan túrli taýarlar men kólikterdi, temeki, alkogol men esirtkilerdi zańsyz ótkizbek bolǵan.
Kedende anyqtalǵan kontrabandanyń aýqymyna qarap, elge zańsyz taýar tasymaldaý máselesi qanshalyqty ózekti ekenin kórýge bolady. Túrkııanyń saýda mınıstrligi men oǵan baǵynyshty uıymdar zańsyz saýdamen aınalysatyn uıymdasqan qylmystyq toptarmen kúresti jalǵastyrýda. Bul rette ekonomıkalyq, qoǵamdyq qaýipsizdikti qorǵaýǵa baǵyttalǵan keden qyzmetiniń áreketi óziniń tıimdiligin kórsetip otyr.
Túrkııa shekarada baqylaýdy qataıtyp, ózge quqyq qorǵaý organdarymen birlesken operatsııalardy júrgize otyryp, kontrabandamen kúreske erekshe nazar aýdara bastady. Jedel-izdestirý sharalary ishki naryqty qorǵap qana qoımaı, kontrabandashylardyń kesirinen zııan kelýi múmkin memlekettik kiristerdi saqtaýǵa jaǵdaı jasaıdy.
Túrkııa keden organynyń qyzmetkerleri 32,6 mlrd lır somasy keden júıesin nyǵaıtyp, Túrkııa men onyń aımaqtarynda óz áreketterin júzege asyrǵysy keletin qylmystyq toptarmen kúresti belsendi júrgizýdiń qanshalyqty mańyzdy ekenin kórsetip otyrǵanyn atady.
Osyǵan deıin Túrkııada túrli uıymdasqan qylmystyq toptardyń 157 múshesi ustalǵany týraly jazdyq.
