Túrkııada 74 áskerı qyzmetker qamaýǵa alyndy
ASTANA. QazAqparat - Túrkııada bıylǵy 15 shildedegi tóńkeriske qatysy bar áskerı qyzmetkerlerdi quryqtaý operatsııasy áli de jalǵasýda. Búgin tańerteń osy eldiń quzyrly organdary Konııaǵa qarasty 17 provıntsııa men 3-shi ushqyshtar Bas qolbasshylyǵynda tintý júrgizip, 74 áskerı qyzmetkerdi qamaýǵa aldy, dep habarlaıdy Habar 24 telearnasy.
Olarǵa Konııa provıntsııasynyń Bas prokýratýrasy «konstıtýtsııa talaptaryn óreskel buzyp, zań shyǵarýshy organdarynyń qyzmetine kedergi keltirdi bılikke qarsy kóterilis uıymdastyrdy jáne terrorlyq uıymǵa qolǵabys etti» degen aıyp taǵýda.
Esterińizde bolsa, osyǵan deıin mundaı aýyr aıyppen 3-shi ushqyshtar jáne Konııa garnızonynyń burynǵy qolbasshysy general-maıor Halýk Shahar men joǵary laýazymdy 23 ofıtser temir torǵa toǵytylǵan bolatyn.
