Túrkııada 6 aqpannan beri 22,5 myń jerasty dúmpýi tirkeldi

ANKARA. ANADOLY - QazAqparat - 6 aqpannan beri, ıaǵnı epıtsentri Túrkııanyń Qahramanmarash qalasynda bolǵan joıqyn jer silkinisinen keıin 22 500-ge jýyq jerasty dúmpýi boldy. Bul týraly Túrkııanyń Tótenshe jaǵdaılardy basqarý jáne aldyn alý basqarmasynyń (AFAD) basshysy ıÝnýs Sezer Túrkııa ǵylymı-tehnıkalyq zertteý keńesi (TUBITAK) onlaın rejıminde uıymdastyrǵan jer silkinisin zertteý konferentsııasynda sóılegen sózinde aıtty, dep habarlaıdy QazAqparat Anadoly aqparat agenttigine silteme jasap.

Onyń aıtýynsha, 6 aqpanda Qahramanmarashtaǵy jer silkinisi 1668 jyly Soltústik Anadoly men 1939 jyly Erzındjandaǵy osyndaı apattardan keıingi úshinshi iri jer silkinisi boldy. «Bul áser etý aımaǵy, qıraý jáne adam shyǵyny boıynsha eń úlken apat boldy», - dedi Sezer.

AFAD basshysy jer silkinisterinen aımaqta turatyn 15 mln-ǵa jýyq adam zardap shekkenin aıtty.
«Magnıtýdasy 7,7 bolǵan birinshi jer silkinisiniń uzaqtyǵy 65 sekýnd, al ekinshi 7,6 baldyq jer silkinisiniń uzaqtyǵy 45 sekýndty qurady. Qazirgi ýaqytta shamamen 22 500 jerasty dúmpýleri boldy. Bul kórsetkish AFAD jyl ishinde tirkegen jer silkinisiniń ortasha sanyna teń. Magnıtýdasy 5-6 bolatyn dúmpýler sany – 47. Eki jer silkinisi saldarynan uzaqtyǵy 400 shaqyrymdaı jerústi jarylystary oryn alyp, jer qyrtysynda 7,5 metrge deıingi yǵysýlar paıda boldy», - dedi Sezer.

Onyń aıtýynsha, epıtsentri Qahramanmarashta bolǵan jer silkinisi saldarynan 56 426 ǵımarat qıraǵan, 206 452 ǵımarat aýyr, 48 984-i ortasha jáne 516 352-si jeńil túrde buzylǵan.
Sezer izdeý-qutqarý jumystarynan keıin birinshi kezeńde aımaqqa 160 myń shatyr jiberilgenin atap ótti. «Qazirgi ýaqytta 610 myńǵa jýyq shatyr ornatyldy, 289 konteınerlik alańǵa 45 myń konteıner qoıyldy», - dedi AFAD basshysy.
«Birinshi kezeńde aımaqta jer silkinisinen zardap shekken 2 mln 800 myń adam ornalastyryldy, qazir 2,5 mln adam panalap otyr. Zilzaladan zardap shekken taǵy 800 myń jer adam aımaqtan tys jerlerge ornalastyryldy», - dep qosty Sezer.
Buryn habarlanǵandaı, 6 aqpanda Túrkııanyń ońtústik-shyǵysynda magnıtýdasy 7 baldan asatyn eki jer silkinisi boldy (jergilikti ýaqyt boıynsha 04:17-de – 7,7 ball jáne 13:24-te – 7,6 ball).
Túrkııanyń ońtústik-shyǵysynda bolǵan joıqyn jer silkinisinen qaza tapqandar sany 50 myńnan asty.
Joıqyn jer silkinisi kórshiles elderde, sonyń ishinde Sırııa, Lıvan, Soltústik Kıprdegi Túrik Respýblıkasy, Grekııa Kıprinde jáne Irakta da sezildi.