Túrkııada 44 orman órtine qatysty tergeý júrgizilip, kúdiktiler qamaýǵa alyndy
ASTANA. KAZINFORM – Túrkııada orman órtterine qatysty tergeý aıasynda alty kúdikti qamaýǵa alynyp, taǵy toǵyz adam sot baqylaýyna alyndy, dep habarlaıdy Kazinform agenttiginiń Ankaradaǵy menshikti tilshisi.
Hürriyet Daily News basylymynyń málimetinshe, 2026 jylǵy 1 maýsymnan beri Túrkııanyń 16 provıntsııasynda bolǵan 44 orman órti boıynsha qozǵalǵan is aıasynda 29 kúdiktiniń jeke basy anyqtalǵan.
Túrkııanyń Ádilet mınıstri Akyn Gıýrlek alty adamnyń qamaýǵa alynǵanyn, taǵy toǵyz adamnyń sot baqylaýyna berilgenin málimdedi. Onyń aıtýynsha, tergeý jumystary mınıstrliktiń baqylaýynda.
Mınıstr ormandy qasaqana órtegen nemese abaısyzda órttiń shyǵýyna sebep bolǵan tulǵalar zańda kózdelgen eń qatań jazaǵa tartylatynyn atap ótti. Ol árbir oqıǵa boıynsha tergeý sońyna deıin jetkiziletinin aıtty.
— «Jasyl Otan» — halqymyzdyń ortaq baılyǵy. Qylmys belgileri bar birde-bir orman órti ashylmaı qalmaıdy, — dedi mınıstr.
Qazirgi ýaqytta Túrkııa prokýratýrasy órt bolǵan jerlerden jınalǵan materıaldardy, beınebaqylaý kameralarynyń jazbalaryn, telefon baılanystary týraly derekterdi, kýágerlerdiń jaýaptaryn, sarapshylardyń qorytyndylaryn jáne tehnıkalyq zertteý nátıjelerin zerdelep jatyr. Maqsat — órtterdiń shyǵý sebepterin anyqtap, árbir kúdiktiniń jaýapkershilik deńgeıin belgileý.
Aldyn ala málimet boıynsha, órtterdiń bir bóligi qasaqana qoıylǵan. Qalǵandary dánekerleý jumystary kezinde shyqqan ushqynnan, astyq jınaıtyn kombaındardyń aqaýynan, tegistegish quraldardy paıdalanýdan, omartashylar qoldanatyn tútindetkishterden, baqsha qaldyqtaryn órteýden, sondaı-aq elektr jelilerindegi qysqa tuıyqtalý men baǵanalardyń zaqymdanýynan týyndaǵan.
Sottar Izmır provıntsııasynyń Torbaly jáne Mýgla provıntsııasynyń Ortedja aýdandaryndaǵy qasaqana órt qoıý faktileri boıynsha kúdiktilerdi qamaýǵa sanktsııa berdi. Sonymen qatar Balykesır provıntsııasynyń Býrhanıe aýdanynda dánekerleý jumystary saldarynan shyqqan órtke baılanysty bir adam qamaýǵa alyndy. Adyıaman provıntsııasynda lashyqty órtegenin moıyndaǵan kúdikti de kúzetpen qamaýǵa alyndy.
Buǵan deıin Túrkııanyń birneshe óńirinde aýqymdy orman órtteri jalǵasyp jatqany habarlanǵan bolatyn. Arnaıy qyzmetter órtpen áýeden jáne jerden táýlik boıy kúres júrgizip jatyr.
