Túrkııada 4,7 ball qýatymen jer silkindi

ANKARA. QazAqparat – Túrkııanyń tabıǵat apattarymen kúres agenttiginiń málimeti boıynsha, juma kúni Túrkııanyń shyǵysyndaǵy Malatıa provıntsııasynda magnıtýdasy 4,7 baldyq jer silkinisi tirkeldi, dep habarlaıdy QazAqparat tilshisi Anadoly agenttigine silteme jasap.

Tótenshe jaǵdaılar jáne tabıǵat apattarymen kúres basqarmasynyń (AFAD) deregi boıynsha, jerasty dúmpýi Pýtýrdj aýdanynda jergilikti ýaqytpen 11:27-de 6,94 shaqyrym tereńdikte bolǵan.

Sondaı-aq zilzala jaqyn mańdaǵy Gazıantep, Shanlyýrfa jáne Adııaman provıntsııalarynda sezilgen.

Malatıa gýbernatory Aıdyn Barýs ázirge qurbandar men múlikke zaqym kelgeni týraly aqparat túspegenin aıtty.

«Jandarmerııa brıgadasy men AFAD qazir sol aýdanda, biz jaǵdaıdy muqııat baqylap otyrmyz», - dedi provıntsııa basshysy Anadoly agenttigine.

Túrkııa negizgi jaryq boıynyń joǵary jaǵynda ornalasqan, sol sebepti bul elde apatty zilzala jıi bolady.

Bıyl 30 qazanda Túrkııanyń batysynda 6,6 baldyq jer silkinisi boldy. Zilzala oshaǵy Izmır provıntsııasy Seferıhısar qalasy mańynda Egeı teńizinde tirkeldi. Izmırdegi apat saldarynan 20 ǵımarat qırap, 114 adam mert boldy, 1035 turǵyn zardap shekken bolatyn.

Eske sala ketsek, Izmıt qalasynda 1999 jyly 7,6 baldyq zilzala bolyp, 17 myńnan asa turǵyn qaza tapty. 2011 jyly Vane qalasyndaǵy jerasty dúmpýinen 500-den asa adam kóz jumdy.