Túrkııada 24 mln adam baspana jaldap turýǵa májbúr

ASTANA. KAZINFORM – Túrkııada baǵanyń rekordtyq ósýi men bos turǵan páterler sanynyń artýy aıasynda jalǵa alýshylardyń sany kóbeıip jatyr, dep habarlaıdy QazAqparat agenttiginiń menshikti tilshisi. 

Sońǵy 10 jylda Túrkııada úı ıeleriniń úlesi 61,1%-dan 56,1%-ǵa deıin azaıǵan, al jalǵa alýshylardyń sany 22,1%-dan 28%-ǵa deıin artqan. Túrkııalyq Karar gazetiniń málimetinshe, búginde elde 24 mıllıonnan astam adam baspanany jaldap turýǵa májbúr.

Sarapshylar mundaı ózgeristerge birneshe negizgi sebepti atap kórsetedi: jyljymaıtyn múlik baǵasynyń sharyqtaýy, ıpotekalyq mólsherlemelerdiń joǵary bolýy jáne turǵyn úıge baǵyttalǵan alypsatarlyq ınvestıtsııalar.

2015 jyldan beri Túrkııada jyljymaıtyn múlik quny 1815%-ǵa artqan. Bul — Ekonomıkalyq yntymaqtastyq jáne damý uıymyna (EYDU) múshe elder arasyndaǵy ortasha kórsetkishten 18 ese joǵary. Sol kezeńde jaldaý aqysy da 12 ese qymbattaǵan.

Mysaly, 2015 jyly 500 myń túrik lırasyna baǵalanǵan páter búginde 9,6 mıllıon lıraǵa (shamamen 250 myń AQSh dollary) teń. Mundaı baspanany aı saıyn jalǵa alý aqysy 2,5 myń lıradan 32,5 myń lıraǵa deıin (shamamen 850 dollar) ósken.

2015 jyldan 2024 jylǵa deıin elde 6,94 mıllıon jańa páter salynǵanymen, olardyń tek 5,31 mıllıony ǵana satylǵan. Qalǵan 1,63 mıllıon páter áli ıesiz bos tur.

Ásirese, bul másele iri qalalarda ýshyǵyp tur. Munda elıtalyq turǵyn úıler ınvestıtsııalyq maqsatta satyp alynady — olar ne qaıta satylady, ne bolmasa qymbat baǵaǵa jalǵa beriledi. Al qarapaıym mıllıondaǵan azamat úshin páter satyp alý túgili, jalǵa alý da barǵan saıyn qıyndap barady.

Sarapshylar Túrkııadaǵy turǵyn úı naryǵynda áleýmettik shıelenis kúsheıip kele jatqanyn aıtyp, keń aýqymdy halyqqa turǵyn úıdiń qoljetimdiligin qamtamasyz etý úshin júıeli sheshimder qabyldaý qajet ekenin alǵa tartyp otyr.

Aıta ketelik Túrkııa Ortalyq bankiniń rezervteri 141 mlrd dollarǵa deıin tómendedi.