Túrkııada 163 orman órtiniń basym kópshiligi aýyzdyqtaldy

NUR-SULTAN. Anadoly-QazAqparat – Túrik órt sóndirýshileri sońǵy aptala eldegi orman órtiniń basym bóligin baqylaýǵa aldy, dep habarlaıdy QazAqparat Anadoly aqparat agenttigine silteme jasap.

Bul týraly seısenbi kúni ótken brıfıngte Túrkııanyń aýyl jáne orman sharýashylyǵy mınıstri Bekır Pakdemırlı málim etti.

«28 shilde men 3 tamyz aralyǵynda eldiń 38 provıntsııasynda bolǵan 163 órttiń 152-si sóndirildi», - dedi vedomstvo basshysy.

Mınıstr tabıǵı apatpen kúres jolynda 16 ushaq, 9 ushqyshsyz basqarylatyn ushý apparaty, 51 tikushaq, bir ushqyshsyz basqarylatyn tikushaq, 805 avtotsısterna, 155 ekskavator jáne 5200 arnaıy qyzmetker jumyldyrylǵanyn málim etti.

Pakdemırlı orman órtin sóndirýge tartylǵan amfıbııa-ushaqtardyń sany 3-ten 6-ǵa deıin, al tikushaq sany – 45-ten 57-ge deıin óskenin qosyp ótti.

Onyń aıtýynsha, órtti sóndirýge barlyǵy 72 ushý apparaty tartyldy.