Túrkııada 16 jasqa tolmaǵandarǵa áleýmettik jelini paıdalanýǵa tyıym salyndy

ASTANA. KAZINFORM — Túrkııa úkimeti 16 jasqa tolmaǵandarǵa áleýmettik jelini shekteý jáne 18 jasqa tolmaǵan balalarǵa jazany qaıta qarastyrý sharalaryn aıaqtady, dep habarlaıdy NTV.

Jobadaǵy bes túrli zańǵa ózgertýler men tolyqtyrýlar engizý kózdelgeni habarlanyp, 17 baptan turatyn toptama daıyndaldy. Bul paket eki negizgi blokty qamtıdy: «Balalar qylmysymen kúresý protsedýralary» jáne «Balalardy tsıfrlyq táýekelderden qorǵaý erejeleri».

Tsıfrlyq táýekelderden qorǵaý sheńberinde áleýmettik jeli qyzmetiniń operatorlary 15 jasqa tolmaǵan balalarǵa qyzmet kórsetpeıdi, ıaǵnı halyqaralyq deńgeıde belsendi qoldanylatyn áleýmettik jelilerdi 16 jasqa tolmaǵan balalar paıdalana almaıdy.

Kámeletke tolmaǵandar arasyndaǵy quqyqbuzýshylyq týraly bólimde 15 pen 18 jas aralyǵyndaǵy qylmys jasaǵan adamdar qamtylǵan. Qoldanystaǵy zańnamaǵa sáıkes jaza osy jastaǵy adamdarǵa jeńildetildi. Jańa erejelerge sáıkes, aýyr qylmystar úshin jaza merzimi uzartylady: mysaly, aýyrlatylǵan ómir boıyna bas bostandyǵynan aıyrý jazasynyń ornyna beriletin 24 jylǵa bas bostandyǵynan aıyrý jazasy 27 jylǵa deıin, al ómir boıyna bas bostandyǵynan aıyrý jazasynyń ornyna beriletin 15 jylǵa bas bostandyǵynan aıyrý jazasy 18 jylǵa deıin ulǵaıtylýy múmkin.

Sondaı-aq jobada eger qylmys qasaqana nemese aýyr zardaptarǵa ákep soqqan bolsa, ne adam buryn qasaqana qylmys jasaǵan bolsa, sottyń jazany jeńildetpeýge quqyǵy bar ekeni de qarastyrylǵan.

Eske sala keteıik, Túrkııa Parlamentiniń spıkeri jańa Konstıtýtsııa qabyldaýǵa shaqyrdy.