Túrkııada 1500 jyl buryn salynǵan sý kanaly tabyldy
MARDIN. KAZINFORM – Túrkııanyń ońtústik-shyǵysyndaǵy Mardın provıntsııasynda ornalasqan kóne Dara qalasynda qazba jumystary kezinde aýyz sý aǵyp turǵan 1500 jyl tarıhy bar kanal tabyldy, dep habarlaıdy Anadoly agenttigi.
Málim bolǵandaı, Mardın murajaıynyń qolǵa alýymen qazba jumystary Mardın provıntsııasynyń ákimshilik ortalyǵynan 30 shaqyrym jerde 38 jyl buryn bastalǵan.
Qazirgi kezde arheologııalyq qazba jumystary kóne qalanyń agorasynda (saýda alańy) júrgizilip jatyr.
«Shyǵys Rım ımperııasy Dara qalasyn sasanıdter shapqynshylyǵynan qorǵaný maqsatynda salǵan. Agorada Rım dáýirindegi kanalmen birge, sondaı-aq 10 saýda orny anyqtaldy. Kezinde aýdanǵa aýyz sý jiberilgen kanalǵa shamamen eki tonna tas úıilgen. Arheologtar kanaldyń 30 metrlik bóligin tapty», - dep jazady Anadoly.
Mardın murajaıynyń dırektory jáne qazba jumystarynyń jetekshisi Abdýlǵanı Tarkan Anadoly agenttigine bergen suhbatynda óz komandasy 507 jyly ımperator Anastasıos negizin qalaǵan Dara qalasynyń mańyzdy sáýlet eskertkishterine qol jetkizgenin aıtqan.
«Darada Ystanbuldaǵy Bazılık tsısternasyna uqsas sý tsısternalary bar. Qalaǵa sý tsısternadan kanaldar júıesi men tsement qubyrlar arqyly keledi. Bul – qalanyń aýyz sýǵa qajettiligin óteý úshin 1500 jyl buryn salynǵan sý qubyry», - dep túsindirdi ol.
Foto: Anadoly
