Túrkııada 1 qarashadan bastap balalardyń áleýmettik jelini paıdalanýyna shekteý qoıylady
ASTANA. KAZINFORM — Túrkııada balalardyń áleýmettik jelilerdi paıdalanýyna qatysty jańa shekteýler 1 qarashadan bastap kúshine enedi.Túrkııa prezıdenti ákimshiligi janyndaǵy Kıberqaýipsizdik basqarmasynyń tıisti normatıvtik aktisi 10 qazanda úkimettiń Resmi Gazete resmı basylymynda jarııalandy.
Report agenttiginiń habarlaýynsha, qujatqa sáıkes, jańa talaptar 2026 jylǵy 1 qarashadan bastap qoldanysqa engiziledi. Erejeler boıynsha áleýmettik jeliler 15 jasqa tolmaǵan balalarǵa qyzmet kórsete almaıdy. Al 15 pen 18 jas aralyǵyndaǵy jasóspirimder úshin platformalar qaýipsizdik pen jeke derekterdi qorǵaý sharalary kúsheıtilgen bólek rejım engizýge mindetti. Qoldanystaǵy akkaýnttardyń ıeleri de jasyn rastaý rásiminen ótýi kerek. Bul talapty oryndaý merzimi — 2027 jylǵy 31 naýryz.
Paıdalanýshylardyń jasy arnaıy sáıkestendirý quraly arqyly memlekettik qyzmetterdiń biryńǵaı e-Devlet júıesinde rastalady. 15–18 jastaǵy jasóspirimderdiń akkaýnttary jabyq bolady. Olarǵa tikeleı efırge shyǵýǵa, jekelendirilgen jarnamalardy kórýge jáne kontentti usynýdyń keıbir tetikterin paıdalanýǵa shekteý qoıylady. Áleýmettik jeliler kámeletke tolmaǵandarǵa olar týraly jınalǵan derekter negizinde ózge akkaýnttardy usyna almaıdy. Sondaı-aq jasóspirimderdiń profılderin basqa paıdalanýshylarǵa usynýǵa tyıym salynady.
Budan bólek, kámeletke tolmaǵandardyń jeke derekterin qorǵaý talaptary kúsheıtiledi. Áleýmettik jeliler balalardyń akkaýnttaryn telefon kitapshalarymen, baılanys tizimderimen, elektrondyq poshta mekenjaılarymen, sondaı-aq basqa qosymshalar men platformalardaǵy dostar jáne jazylymdar tizimimen sınhrondaı almaıdy. Mundaı derekkózderge qol jetkizýge jáne olardan alynǵan aqparatty óńdeýge de ruqsat etilmeıdi.
Jańa talaptar ata-analar men qamqorshylarǵa da qatysty. Áleýmettik jeliler olarǵa balalardyń akkaýnttaryn, baptaýlaryn, jelide ótkizetin ýaqytyn, geolokatsııasyn, aqyly operatsııalaryn jáne basqa da fýnktsııalaryn baqylaýǵa arnalǵan quraldardy usynýǵa mindetteledi.
Aıta keteıik, elimizde balalardyń áleýmettik jelidegi akkaýnttaryna qatysty jańa tártip engizilmek.
