Túrkııa joǵary jyldamdyqty temir jol jelisin keńeıtedi
Bul týraly kólik, keme qatynasy jáne kommýnıkatsııa mınıstri Ahmet Arslan málim etti, dep habarlady «Anadolý» agenttigi.
«Bıyl Túrkııa úkimeti temir jol kóligi salasyna 11, 3 mlrd lıra ınvestıtsııalady. Atap aıtqanda, ınvestıtsııa joǵary jyldamdyqty poıyzdarǵa arnalǵan ınfraqurylymdy qurýǵa baǵyttaldy. Birinshi joǵary jyldamdyqty poıyz Túrkııada alǵash ret 2009 jyly paıda boldy. Qazirgi ýaqytta Túrkııadaǵy joǵary jyldamdyqty temir jol jelisiniń uzyndyǵy 1213 shaqyrymdy quraıdy», - dedi Ahmet Arslan.
Sondaı-aq mınıstr 2019 jyly Ankara, Afonkarahısar, Ýshak, Manısý jáne Izmırdi biriktiretin joǵary jyldamdyqty temir jol jelisi qurylysynyń aıaqtalatyndyǵyn aıtty. Baký-Tbılısı-Kars jobasynyń mańyzdy býyny bolyp tabylatyn Ankara-Kyrykkale-Iozgat-Sıvas joǵary jyldamdyqty temir jol jelisin salý jumystary jalǵasady.
Baký-Tbılısı-Kars temir joly ázerbaıjan-grýzın-túrik memleketaralyq kelisimi negizinde salynýda. Jobany iske asyrý 2008 jyly bastalǵan. Joba aıasynda Ahalkalakı stansasynan Grýzııaǵa Kars qalasyndaǵy temir jolǵa deıin jeli salynady. Jalpy uzyndyǵy 826 shaqyrym.