Túrkııa jyl saıyn 25 mıllıard bótelkeni qaıta óńdeýdi qolǵa aldy

ASTANA. KAZINFORM — Túrkııada depozıttik basqarý júıesiniń kómegimen jyl saıyn 25 mıllıardtan astam sýsyn bótelkesin qaıta óńdeýge jiberý qolǵa alyndy, dep habarlaıdy Anadoly. 

Elde depozıttik logotıpi bar qaptama arnaıy tehnıka arqyly jınalyp, qaıta óńdeýge jiberiledi. Bul týraly Túrkııanyń qorshaǵan orta, qala qurylysy jáne klımattyń ózgerýi mınıstrligi málimdedi.

Joba boıynsha Sakarıa provıntsııasy men Ankaradaǵy Qyzyldjahamam aýdany pılottyq aımaq retinde anyqtaldy. Sonymen qatar Erzýrým, Mersın, Gazıantep, Samsýn, Izmır jáne Konıada depozıttik mashınalardy ornatý bastaldy.

Júıe aıasynda shyny, plastık jáne metall ydystar depozıttik qaptamany qabyldaý avtomattary arqyly jınalady. Tazalanyp, suryptalǵan bótelke qaıta óńdeý jáne óndirý protsesinen ótedi. Osylaısha, óńdeý tıimdiligin arttyrý jáne shıkizat ımportyna táýeldilikti azaıtý josparlanyp otyr.

Bul eń aldymen qorshaǵan ortanyń lastanýyn azaıtady. Tabıǵı resýrstardy únemdeıdi jáne qalalardaǵy qoqysty joıady dep josparlanǵan. Munyń ulttyq ekonomıkaǵa qosatyn úlesi jylyna shamamen 520 mıllıard eýro bolmaq. Túrkııa qaıta óńdeý arqyly qosymsha ekonomıkalyq qundylyq jasaýdy maqsat tutqan.

Qaıta óndirilgen protsesterde qalpyna keltirilgen materıaldardy paıdalaný energııany únemdeýdi, kómirtegi shyǵaryndylaryn azaıtýdy jáne aınalmaly ekonomıka modelin nyǵaıtýdy qamtamasyz etýi kerek.

Osyǵan deıin Nazarbayev University Taý-ken isi jáne Jer týraly ǵylymdar mektebiniń professory Ata Akchıl Qazaqstandaǵy 40 mlrd tonna qaldyqty qaıta óńdeý kerek ekenin aıtqan bolatyn.