Túrkııa jiberilgen snarıadqa jaýap retinde Sırııany oq astyna aldy
ASTANA. 4 qazan. QazAqparat - Qazannyń 3-inen 4-ine qaraǵan túni Túrkııa Sırııaǵa qarsy artıllerııalyq oq jaýdyra bastady, dep habarlady Reuters Túrkııa premer-mınıstri Rejep Erdoǵannyń resmı ókilderine silteme jasap.
Úkimettiń málimdemesinde «túrik artıllerııasy urysty júrgizý erejelerine sáıkes túrik radarlary belgilegen nysandar boıynsha oq ashty».
Túrik sheneýnikteriniń sózine qaraǵanda, bul túriktiń shekara mańyndaǵy Akchakala qalasynda bolǵan oqıǵaǵa jaýap retinde jasalýda. Sırııanyń aýmaǵynan jiberilgen snarıadtyń turǵyn-úıge qulaý saldarynan 6 adam (onyń ishinde bir bala) kóz jumdy, 10-y jaraqattandy.
Qazirgi ýaqytta kýá bolǵandardyń sózine qaraǵanda, sırııanyń shekarasyna tankter, raketalyq batareıalar men artıllerııanyń qosymsha kúshteri tartylýda.
Túrik-sırııa shekarasynda bolyp jatqan oqıǵaǵa qatysty NATO-nyń keńesi de ótti. Soltústikatlantıkalyq alıans Sırııanyń is-áreketin synǵa alyp, onyń basshysyn «halyqaralyq quqyq normalaryn belden basýdy toqtatýǵa» shaqyrdy.
Esterińizge sala keteıik, Túrkııanyń premer-mınıstri R.Erdoǵan Sırııa prezıdenti Bashar Asadtyń rejimine qarsy birneshe márte sóz sóılegen bolatyn.
Jýyrda sırııalyq Aleppo qalasynyń ortalyǵynda bolǵan jarylystyń saldarynan 48 adam ajal qushyp, 70-i jaraqattar aldy.
