Túrkııa Jerorta teńizindegi eń úlken áýe kemesin qurastyrdy
ASTANA. KAZINFORM — Túrkııa jańa Ulttyq áýe tasymaldaýshysy (MUGEM) jobasymen frantsýzdyń Charles de Gaulle áýe kemesin basyp ozyp, Jerorta teńizindegi eń iri áskerı keme salǵan memleketke aınalmaq, dep habarlaıdy Anadoly.
Frantsııanyń Le Figaro gazeti habarlaǵandaı, prezıdent Rejep Taıyp Erdoǵan ótken aptada TEKNOFEST Mavi Vatan festıvalinde «alyp jobanyń» resmı bastaýyn jarııalady. Jospar boıynsha, áýe tasymaldaýshy tolyqtaı Túrkııada jobalanyp, salynyp, 2030 jylǵa qaraı sapqa qoıylady.
Basylym derekterine sáıkes, «Ulttyq áýe tasymaldaýshysynyń» uzyndyǵy 285 metr, eni 72 metr, al sý yǵystyrǵysh kólemi 60 myń tonnadan asady. Bul kórsetkishter frantsýzdyń Charles de Gaulle áýe kemesinen (261 metr, 42,5 myń tonna) aıtarlyqtaı artyq. Keme joıǵysh ushaqtarmen qatar Kızılelma jáne ANKA 3 sııaqty jańa býyndy soqqy berýshi drondardy da tasymaldaı alady.
Áýe tasymaldaýshyny 2027–2028 jyldary sýǵa túsirý josparlanǵan. Ol 50 áýe apparatyn alyp júre alady. Batystyq balamalarynan aıyrmashylyǵy, keme bastapqydan-aq zamanaýı drondyq júıelerdi paıdalaný úshin jobalanǵan.
Jergilikti baspasózge bergen suhbatynda ınjener-leıtenant Aıkýt Demırezen keme Túrkııadan Nıý-Iorkke deıin baryp, keri qaıtýǵa janarmaı quımaı-aq qaýqarly ekenin aıtty. Onyń sózinshe, muryn bóliginiń erekshe qurylysy otyndy 1,5 paıyzǵa deıin únemdeýge múmkindik beredi.
Le Figaro atap ótkendeı, áýe tasymaldaýshynyń 80 paıyzdan astam komponentteri Túrkııada óndiriletin bolady. Bul joba eldi osyndaı deńgeıdegi kemelerdi óz kúshimen qura alatyn sanaýly memleketterdiń qataryna qosady.
Erdoǵan buǵan deıin jańa áýe tasymaldaýshy TCG Anadolu-dan da asyp túsetinin, ony «túrik floty úshin tarıhı qadam ári Palestına men Somalı sekildi ezilgen halyqtardy qoldaýdyń sımvoly» dep ataǵan edi.
Sonymen birge basylym Frantsııa da óz jobasyn — sý yǵystyrý kólemi 75 myń tonnalyq PANG kemesin jasap jatqanyn eske saldy. Ol kelesi onjyldyqta «Jerorta teńiziniń jańa alybyna» aınalmaq.
Aıta ketelik Túrkııa prezıdenti Rejep Taıyp Erdoǵan eldiń óz radarlaryn basqarý jáne áýe shabýylyna qarsy qorǵanys júıelerin damytý nıetin málimdegen edi.