Túrkııa jasóspirimderdiń áleýmettik jelini paıdalanýyna shekteý engizdi

ASTANA. KAZINFORM – Túrkııada bıyldan bastap 16 jasqa tolmaǵan jasóspirimderdiń áleýmettik jelini paıdalanýyn shekteýge baǵyttalǵan jańa ereje kúshine enedi, dep habarlaıdy Kazinform menshikti tilshisi.

Jańa zańǵa sáıkes, jas paıdalanýshylar áleýmettik jelige ata-anasy nemese qamqorshysynyń jazbasha kelisimimen ǵana tirkelip, paıdalana alady.

Úkimet bul sharany balalardyń psıhıkalyq densaýlyǵyn saqtaý, kıberbýllıng pen zııandy kontentke ushyraýdyń aldyn alý qajettiligimen túsindirdi. Bastama gadjetterge táýeldilikti azaıtýǵa jáne jastardy offlaın ómirde belsendirek bolýǵa yntalandyrýǵa baǵyttalǵan.

Túrkııanyń Kólik jáne ınfraqurylym mınıstri Abdýlkadır Ýraloglý búkil álem áleýmettik jelilerge kirýdi shekteý úshin 13 pen 16 jas týraly aıtyp jatqanyn atap ótti.

- Protsess salalyq mınıstrliktermen, mekemelermen birlesip júrgizilip jatyr. Biz 16 jasqa nazar aýdaryp, osy baǵytta biraz jumys isteımiz jáne balalarymyzdy sanaly túrde qorǵaımyz. 16 jastaǵy jasóspirimderimiz bilim men damýǵa kóbirek kóńil bólýi kerek. Túrkııada 16 jastan asqan balalarǵa áleýmettik jelilerge erkin kirýge múmkindik beremiz, - deıdi mınıstr.

Ýákiletti organ bul sheshim psıhologııa salasyndaǵy mamandardyń usynystaryna, sondaı-aq osyndaı shekteýler óz tıimdiligin dáleldep úlgergen basqa elderdiń tájirıbesine negizdelgenin aıtty.

Áleýmettik medıa platformalary jasty tekserý jáne ata-ananyń kelisimi boıynsha arnaıy mehanızmderdi engizýi kerek dep kútilip otyr. Al talaptardy buzǵan kompanııalar aıyppul tóleıdi.

Eske sala ketsek, Túrkııada balalardyń áleýmettik jeli men smartfon paıdalanýyna shekteý engiziletinin jazǵan bolatynbyz.