Túrkııa jáne taǵy 11 el Izraıldiń Sırııadaǵy áskerı bazaǵa jasaǵan soqqysyn aıyptady
ASTANA. KAZINFORM — Túrkııa jáne taǵy 11 el Izraıldiń Sırııadaǵy Ábý ád-Dýhýr áýe bazasyna jasaǵan soqqysyn «shekten shyqqan shıelenisý» dep baǵalap, eldiń egemendigin buzý retinde aıyptady, dep habarlaıdy Kazinform agenttiginiń Ankaradaǵy menshikti tilshisi.
Túrkııa, Aljır, Indonezııa, Iordanııa, Lıvan, Malaızııa, Mavrıtanııa, Pákistan, Palestına, Qatar, Saýd Arabııasy jáne Somalı syrtqy ister mınıstrleri birlesken málimdeme jasap, Sırııanyń soltústik-batysyndaǵy Ábý ád-Dýhýr áskerı bazasyna Izraıl ushaqtarynyń jasaǵan soqqysyn qatań aıyptady.
Olardyń baǵalaýynsha, bul shabýyl Sırııanyń «egemendigin, aýmaqtyq tutastyǵy men saıası birligin óreskel buzý» bolyp sanalady.
Mınıstrler Sırııa aýmaǵy men ınfraqurylymyna jasalyp jatqan soqqynyń jalǵasýy qaýipsizdik pen memlekettik ınstıtýttardy qalpyna keltirý jumystaryna qaýip tóndiretinin, sondaı-aq birneshe jylǵa sozylǵan qaqtyǵystyń gýmanıtarlyq saldaryn ýshyqtyrýy múmkin ekenin eskertti.
Málimdemede Sırııanyń egemendigin odan ári buzý aımaqtaǵy shıelenisti kúsheıtip, Taıaý Shyǵystaǵy beıbitshilik pen turaqtylyqqa nuqsan keltirýi, sondaı-aq halyqaralyq quqyq pen BUU Jarǵysynyń qaǵıdattaryna degen qurmetti álsiretýi múmkin ekeni aıtylǵan.
Syrtqy ister vedomstvolarynyń basshylary halyqaralyq qaýymdastyqty Sırııaǵa jasalyp jatqan shabýylǵa qatysty «berik, aıqyn jáne prıntsıpti ustanym» tanytyp, zań buzýdy toqtatý úshin naqty sharalar qabyldaýǵa shaqyrdy.
Sonymen qatar mınıstrler 1974 jylǵy kúshterdi ajyratý týraly kelisimdi saqtaýǵa shaqyryp, Izraıl kúshterin ózderi basyp alǵan aýdandardan shyǵarýdy talap etti. Olardyń pikirinshe, bul odan ári shıelenistiń aldyn alyp, óńirdegi turaqtylyqty saqtaýǵa qajet.
Elder Sırııanyń egemendigin, táýelsizdigin, aýmaqtyq tutastyǵy men saıası birligin qoldaıtynyn taǵy da rastady jáne osy qaǵıdattarǵa nuqsan keltirýge baǵyttalǵan kez kelgen áreketti qabyldamaıtynyn málimdedi.
Buǵan deıin Túrkııa Izraıl premer-mınıstri Bınıamın Netanıahýǵa qatysty genotsıd isi boıynsha Interpoldan «qyzyl habarlama» jarııalaýdy suraǵany týraly jazǵan bolatynbyz.
