Túrkııa jáne Eýropa elderine et eksporttaý protsesi sońǵy kezeńinde tur - AShM

ASTANA. KAZINFORM – QR Aýyl sharýashylyǵy mınıstrligi Qazaqstannan qashan Eýropa elderine jáne Túrkııaǵa et eksporty bastalatynyn málimdedi.

— QR AShM Veterınarlyq baqylaý jáne qadaǵalaý komıteti Eýropalyq Odaqqa mal sharýashylyǵy ónimderin eksporttaýdy keńeıtý boıynsha júıeli jumys júrgizýde. Qazirgi ýaqytta jylqy etin eksporttaý baǵyty boıynsha biz barlyq qajetti ruqsat qujattaryn alýdyń sońǵy kezeńinde turmyz. Bıznes jumysqa tolyq daıyn, seriktestermen naqty kelisimder jasaldy, - dep jazylǵan Kazinform agenttiginiń saýalyna joldaǵan resmı jaýapta. 

Sondaı-aq vedomstvo Túrkııaǵa et eksportyna qatysty da málimet berdi. 

— Qazirgi ýaqytta QR Aýyl sharýashylyǵy mınıstrligi Túrkııaǵa iri qara mal etin eksporttaýǵa veterınarlyq-sanıtarlyq talaptardy kelisý boıynsha jumys júrgizip boldy. Endi osy protsestiń sheńberinde Túrkııa Respýblıkasynyń Aýyl jáne orman sharýashylyǵy mınıstrligine iri qara mal eti boıynsha toltyrylǵan saýalnama jiberildi jáne Túrkııa Respýblıkasy tarapynan jaýap kútilýde, - delingen habarlamada. 

Aıta keteıik, byltyr jyl sońynda QR Aýyl sharýashylyǵy vıtse-mınıstri Azat Sultanov elimizden Qytaı, Túrkııa jáne Eýropa elderine et eksporttaý bastalatynyn aıtqan bolatyn. 

Sondaı-aq mınıstrlik byltyr Qazaqstan qaı elderge qansha et eksporttaǵanyn málimdedi.