Túrkııa jalǵan jyljymaıtyn múlikke qatysty 451 «altyn» tólqujatty qaıtaryp aldy

ASTANA. KAZINFORM — Túrkııa azamattyq alý maqsatynda jalǵan jyljymaıtyn múlikti satý kesirinen sheteldikterdiń júzdegen «altyn tólqujattarynyń» kúshin joıady, dep habarlaıdy Kazinform tilshisi. 

Túrkııa bıligi ınvestıtsııalyq baǵdarlama arqyly sheteldikterge berilgen 451 pasporttyń kúshin joıǵanyn habarlady. Bul sheshim shetel azamattaryna jalǵan jyljymaıtyn múlik satý arqyly azamattyq alý talaptaryn aınalyp ótýdi uıymdastyrǵan qylmystyq topty joıýǵa baǵyttalǵan aýqymdy arnaıy operatsııanyń nátıjesinde qabyldandy.

Túrkııanyń quqyq qorǵaý organdarynyń málimetinshe, tergeý barysynda 106 kúdikti ustaldy. Olarǵa zańsyz mıgranttardy elge kirgizý, qylmystyq jolmen alynǵan qarajatty jylystatý, alaıaqtyq jáne resmı qujattardy qoldan jasaý sııaqty birqatar aýyr qylmys boıynsha aıyp taǵyldy.

Operatsııa nátıjesinde 1 240 páter, 47 kólik, 65 jer telimi jáne birneshe zańdy tulǵanyń aktıvteri tárkilendi. Tergeý derekterine sáıkes, 451 shetel azamaty jalǵan jyljymaıtyn múlik satyp alý shemasyna qatysqan, endi olar Túrkııa azamattyǵynan aıyrylady. Pasporttardy keri qaıtarý rásimderi bastalyp ketti.

Belgili bolǵandaı, qylmystyq shema kelesideı jumys istegen: shetel azamattary Túrkııa azamattyǵyn alý úshin qajetti ınvestıtsııalyq shekke teń somany (bastapqyda $250 myń, keıin $450 myń) aýdaratyn bolǵan. Alaıda «jyljymaıtyn múlik satyp alǵannan» keıin satýshy satyp alýshyǵa shamamen $100 myńdy qolma-qol qaıtaratyn. Osylaısha mámile jalǵan sıpatta bolyp, sheteldikter ınvestıtsııalyq baǵdarlamanyń naqty talaptaryn aınalyp ótip, azamattyqty zańsyz jolmen alǵan.

Túrkııa bıligi azamattyq berý salasyndaǵy sybaılas jemqorlyq pen zańbuzýshylyqtarǵa qarsy kúresti jalǵastyratynyn jáne ınvestıtsııalyq talaptardyń oryndalýyna baqylaýdy kúsheıtetinin málimdedi.

Shilde aıynda Izmırde sybaılas jemqorlyqqa qarsy iri operatsııanyń nátıjesinde túrik polıtseıleri 126 adamdy ustalǵanyn jazǵan edik.