Túrkııa vıtse-prezıdenti Qazaqstannyń ekologııalyq jobalaryna qyzyǵýshylyq tanytty
ASTANA. KAZINFORM — Túrkııa vıtse-prezıdenti Djevdet Iylmaz Qazaqstannyń ekologııalyq bastamalarymen, jasyl tehnologııalarmen jáne bıoártúrlilikti saqtaý jobalarymen tanysty, dep habarlaıdy Kazinform agenttiginiń Ankaradaǵy menshikti tilshisi.
Djevdet Iylmaz Antalııada ótip jatqan BUU Klımattyń ózgerýi jónindegi negizdemelik konventsııasy (COP31) Taraptarynyń 31-shi konferentsııasy aıasynda Qazaqstannyń Ulttyq pavılonyna bardy. Ol eldiń ekologııalyq bastamalaryna, turaqty damýǵa jáne tabıǵatty qorǵaý jobalaryna baǵyttalǵan kórmeni qarap, onyń mazmunyna joǵary baǵa berdi.
Túrkııa vıtse-prezıdentine ekskýrsııada Halyqaralyq jasyl tehnologııalar jáne ınvestıtsııalyq jobalar ortalyǵynyń basqarma tóraǵasy Sáken Qalqamanov qarsy aldy. Ol Qazaqstannyń ekologııalyq saıasatynyń negizgi baǵyttary, zamanaýı tehnologııalardyń engizilýi jáne tabıǵı resýrstardy tıimdi paıdalaný jobalary jaıly aıtyp berdi.
Kórmeniń negizgi taqyryptarynyń biri Іle-Balqash aımaǵyndaǵy Turan jolbarystarynyń popýlıatsııasyn qalpyna keltirý baǵdarlamasy boldy. Qonaqtarǵa jobanyń maqsattary, onyń ishinde tabıǵı ekojúıelerdi qalpyna keltirý jáne sırek kezdesetin jyrtqyshtardyń jabaıy tabıǵatqa oralýyna jaǵdaıdyń jasalýy týraly áńgimelendi. Ekspozıtsııanyń basty ereksheligi Amýr men Úmittiń tsıfrlyq gıdteri boldy. Turan jolbarystaryna negizdelip jasalǵan, JI ornatylǵan vırtýaldy kómekshiler kelýshilerdi Qazaqstannyń tabıǵatty qorǵaý bastamalarymen birneshe tilde tanystyrdy.
Ulttyq dástúrler men ekologııalyq tutynýdyń zamanaýı qaǵıdattaryn úılestiretin «Quraq kórpe» kórkemdik ınstallıatsııasy qonaqtardyń erekshe nazar aýdardy. Qazaqtyń dástúrli quraq kórpesi resýrstardy tııanaqty basqarýdyń jáne Zero Waste tujyrymdamasyna sáıkes materıaldardy qaıta paıdalanýdyń úlgisi retinde usynylǵan.
Ulttyq pavılon Qazaqstannyń ekologııalyq jetistikterin nasıhattaý, jasyl tehnologııalardy usyný jáne tabıǵatty qorǵaý jobalaryna ınvestıtsııa tartý platformasy retinde qyzmet etti. COP31 aıasynda Qazaqstan 34 ınvestıtsııalyq qujatqa qol qoıdy jáne 38 taqyryptyq is-shara ótkizý josparlanǵan.
Konferentsııaǵa qatysý Qazaqstanǵa óziniń ekologııalyq sheshimderin halyqaralyq qaýymdastyqqa usynýmen qatar, turaqty damý, jasyl tehnologııalardy engizý jáne tabıǵı murany saqtaý salalarynda halyqaralyq seriktestermen yntymaqtastyqty keńeıtýge de múmkindik beredi.
Biz buǵan deıin Qazaqstan COP31 konferentsııasynda klımattyq ınvestıtsııalar platformasyn tanystyrǵanyn habarlaǵan edik.
