Túrkııa úkimeti Semeı ormanshylarynyń qazasyna kóńil aıtty

ANKARA. ANADOLY – QazAqparat – Túrkııa Syrtqy ister mınıstrligi Qazaqstannyń Abaı oblysyndaǵy órtte adamdardyń qaza bolýyna baılanysty kóńil aıtty, dep habarlaıdy QazAqparat Anadolyǵa silteme jasap.

«Abaı oblysynda 14 ormanshynyń qazasy týraly habardy zor kúızelispen qabyldadyq. Qazaqstannyń dos ári baýyrlas halqyna jáne úkimetine kóńil aıtamyz», - delingen vedomstvonyń Twitter-akkaýntynda.

Eske salaıyq, «Semeı» ormany rezervatynda órt 8 maýsym kúni shyqqan bolatyn.
Abaı oblysy ákiminiń orynbasary Dımıtrıı Garıkovtyń aıtýynsha, órt 2 ret túsken naızaǵaıdan tutanǵan.

Tilsiz jaýdy aýyzdyqtaýǵa jumyldyrylǵan 14 ormanshy qaza boldy. Barlyǵy memlekettik nagradaǵa usynyldy.

Semeı ormanyndaǵy órt faktisi boıynsha qylmystyq is qozǵaldy.

Birneshe aýyl turǵyndary qaýipsiz jerge evakýatsııalandy.

10 maýsymda túste jalyn sharpyǵan aýmaq 60 myń gektardan asyp ketkeni habarlandy.

Keshe Prezıdent Qasym-Jomart Toqaev jumys saparymen Abaı oblysyna bardy.

Sapar barysynda Memleket basshysy orman alqaptaryndaǵy órt sóndirý jumystarymen tanysyp, shuǵyl áreket etý shtabynyń otyrysyn ótkizdi jáne órt kezinde qaza tapqan orman sharýashylyǵy qyzmetkerleriniń týystarymen kezdesti.

12 maýsym Semeı ormanyndaǵy alapat órtten qaza bolǵandardy aza tutý kúni bolyp jarııalandy.