Túrkııa túrmelerinde adam sany shekti deńgeıden asyp ketti

ASTANA. KAZINFORM — Túrkııanyń túrme júıesi buryn-sońdy bolmaǵan shamadan tys júktemege tap boldy, dep habarlaıdy Kazinform agenttiginiń menshikti tilshisi.

Eldegi Túrmeler bas basqarmasynyń málimetinshe, bıyl maýsym aıynyń basyndaǵy jaǵdaı boıynsha eldegi jalpy sottalǵandar sany 416 927 adamǵa jetken. Bul kórsetkish Túrkııanyń 34 provıntsııasyndaǵy halyq sanynan kóp ári túrmelerdiń 295 000 adamǵa eseptelgen resmı syıymdylyǵynan aıtarlyqtaı asyp túsedi.

Jalpy sottalǵandardyń ishinde 359 227 adam – úkim shyqqan jazasyn óteýshiler, al 57 700 adam – tergeý ızolıatorynda, sot sheshimin kútip otyr. Sońǵy eki aıda qamaýǵa alynǵandar sany 13 867 adamǵa artqan. Bul Túrkııanyń penıtentsıarlyq júıesine túsetin júktemeniń kúrt óskenin kórsetedi.

Túrkııada túrmeler belgilengen syıymdylyqtan 121 myń adamǵa asyp ketkeni erekshe alańdaýshylyq týǵyzyp jatyr. Bul jaǵdaı qamaýdaǵylardyń ómir súrý jaǵdaıyna, qaýipsizdikke jáne adam quqyqtarynyń saqtalýyna eleýli qaýip tóndiredi.

Qazirgi tańda túrmelerde 18 727 áıel otyr. Bul derek te qoǵam nazaryn aýdarýda, sebebi áıelderdi ustaýǵa arnalǵan jaǵdaılar men ınfraqurylym áli de jetildirýdi qajet etedi.

Sarapshylardyń pikirinshe, qylmystyq saıasatty qaıta qarap, shartty jaza, túzetý jumystary jáne ońaltý baǵdarlamalary sııaqty balama jazalaý sharalaryna nazar aýdarý qajet.

Buǵan deıin habarlanǵandaı, Túrkııada júrgizýshilerge qoıylatyn talap qoǵamda daý týdyrdy.