Túrkııa túrki memleketterimen qorǵanys ónerkásibi salasyndaǵy tájirıbesimen bólisýge daıyn — Erdoǵan
ASTANA. KAZINFORM — Túrkııa túrki memleketterimen qorǵanys ónerkásibi jáne tehnologııalar salasyndaǵy yntymaqtastyqty damytýǵa basa mán beredi. Bul týraly Túrki memleketteri uıymynyń beıresmı sammıtinde Túrkııa Prezıdenti Redjep Taııp Erdoǵan aıtty.
— Tóńiregimizdegi daǵdarystar yntymaq pen is-qımyldy úılestirýdiń mańyzyn kórsetip otyr. Elder arasyndaǵy konsýltatsııalar men yntymaqtastyq tetikterin nyǵaıtý qajet. Sondaı-aq strategııalyq mańyzy bar Orta dálizdi qosa alǵanda, kólik jáne logıstıkalyq jobalardy damytý mańyzdy, — dedi Túrkııa Prezıdenti.
Sonymen qatar ol Palestınadaǵy, Irandaǵy, Ýkraınadaǵy jáne basqa da óńirlerdegi jaǵdaılar neǵurlym tyǵyz úılestirýdi jáne birlesken kúsh-jigerdi talap etetinine nazar aýdartty.
— Túrkııa uıymymyzǵa múshe memlekettermen qorǵanys ónerkásibi jáne tehnologııalar salasyndaǵy tájirıbesimen bólisýge daıyn. Biz osy saladaǵy yntymaqtastyqty damytýǵa úlken mán beremiz, — dedi Redjep Taııp Erdoǵan.
Aıta keteıik, sammıtte Memleket basshysy Túrki memleketteri uıymy geosaıası joba nemese áskerı uıym emestigin, ol baýyrlas elderdiń saýda-ekonomıkalyq, joǵary tehnologııalyq, tsıfrlyq jáne mádenı-gýmanıtarlyq yntymaqtastyǵyn nyǵaıtatyn mańyzdy alań ekenin atap ótti.
