Túrkııadaǵy týrızm salasyndaǵy janjal: týrısterge qaýip tónýi múmkin be

ASTANA.KAZINFORM — Túrkııanyń týrızm ındýstrııasynyń belgili ókilderi qarjylyq qylmys, krıptovalıýta arqyly qarajatty jylystatý jáne salyqtan jaltarý isi boıynsha tergeýge alyndy, dep habarlaıdy Kazinform tilshisi.

Ustalǵandardyń qatarynda Anex Tour kompanııasynyń ıesi Neshet Kochkar, onyń ápkesi jáne kompanııanyń birneshe top-menedjeri bar. Sondaı-aq Armas Hotels qonaqúı jelisiniń ıesi, «qonaqúıler patshasy» atanǵan Halıl Doǵan men Prince Holding basshysy Ismaıl Lepıev te qamaýǵa alynǵan. Barlyǵy alty adam tergeý aıasynda jaýap berip jatyr.

Túrkııanyń qarjy monıtorıngi agenttigi MASAK kúdikti kompanııalardyń shottaryn, sonyń ishinde krıptoaktıvterin buǵattaýy múmkin. Mundaı jaǵdaıda tólemder tizbegi transferlerden bastap qonaqúılermen esep aıyrysýǵa deıin ýaqytsha toqtap qalýy yqtımal. Bul óz kezeginde týrısterdiń vaýcherleri jaramsyz bolyp, demalystary qıyndyqqa aınalý qaýpin týdyrady.

Soǵan qaramastan, naryqta dúrbeleń baıqalmaıdy. Búgin túske deıin Antalııa baǵytyndaǵy brondaý kólemi nebári 1–2 paıyzǵa qysqarǵan. Týroperatorlar áli de Mysyr, BAÁ, Taıland, Vetnam, Goa jáne Shrı-Lanka baǵyttaryna týr satýdy jalǵastyryp jatyr.

Sarapshylardyń baǵalaýynsha, baǵada azdap ósim jáne qysqa merzimdi kidiris bolýy múmkin, biraq naryq birneshe apta ishinde qaıta qalpyna keledi. Tipti jaǵymsyz stsenarııdiń ózinde týrızm salasyndaǵy tómendeý 5 paıyzdan aspaıdy dep kútilýde.

Buǵan deıin habarlanǵandaı, Túrkııa týrızm men tranzıt salasynda oń ekonomıkalyq kórsetkishterge qol jetkizip, medıtsınalyq týrızm baǵytynda da óz pozıtsııasyn nyǵaıtyp keledi.