Túrkııa turǵyndary ınternetke kúnine 7 saǵat ýaqytyn jumsaıdy

ASTANA. KAZINFORM — Túrkııa turǵyndary ınternetke kúnine orta eseppen 7 saǵat 13 mınýt ýaqyt jumsaıdy, dep habarlaıdy Kazinform tilshisi.

Túrkııanyń kólik jáne ınfraqurylym mınıstri Abdýlkadır Ýraloglý el azamattarynyń tsıfrlyq ádetterine qatysty qyzyqty derektermen bólisti. «Digital 2025 Türkiye» esebine sáıkes sońǵy jyldary túrik halqynyń ınternet belsendiligi aıtarlyqtaı artqan.

Eseptegi eń mańyzdy kórsetkishterdiń biri – paıdalanýshylardyń 96,9%-y ınternetke mobıldi qurylǵylar arqyly kiredi. Bul smartfondardyń Túrkııada jelige kirýdiń negizgi quralyna aınalǵanyn rastaıdy. Ortasha alǵanda, el turǵyndary kúnine 7 saǵat 13 mınýtty ınternette ótkizedi. Bul kórsetkish azamattardyń kompıýterler men planshetterdi paıdalanýǵa jumsaıtyn ýaqytynan, ıaǵnı kúnine 3 saǵat 9 mınýttan – birneshe ese joǵary.

Taǵy bir aıta ketetin jaıt, mobıldi qurylǵylar Túrkııadaǵy ınternet-trafıktiń 73,1%-yn qamtamasyz etedi. Bul smartfondardyń ınternet belsendiliginiń negizgi kózi retindegi mańyzdylyǵyn aıǵaqtaıdy.

Budan bólek, mınıstrdiń málimetinshe, qazirgi ýaqytta Túrkııada 80,7 mıllıon adamda, ıaǵnı halyqtyń 92,1%-ynda mobıldi telefon bar, al 77,3 mıllıony ınternetti belsendi qoldanady.

Bul kórsetkishter tsıfrlyq tehnologııalardyń kúndelikti ómirge qalaı áser etetinin jáne mobıldi ınternettiń baılanys pen aqparat alýdyń negizgi quraly retinde qarqyndy damyp kele jatqanyn kórsetedi.

Aıta keteıik, Túrkııada smartfondar Qazaqstannan qaraǵanda eki ese qymbat satylady. Bıyl 1 qańtardan bastap shetelden ákelingen telefondardyń IMEI tirkeý quny 46 myń túrik lırasyna (shamamen 645 myń teńge) deıin ósti.

Budan buryn habarlanǵandaı, túrkııalyqtar úılený toıynyń shyǵynyn únemdeýge kóshti.