Túrkııa turaqtylyq pen beıbitshiliktiń kózi bolýy kerek — Rım Papasy Lev XIV

ASTANA. KAZINFORM — Rım Papasy Lev XIV shetelge alǵashqy sapary barysynda jahandyq qaqtyǵystar jaǵdaıynda dıalogqa shaqyrdy, dep habarlaıdy Euronews. 

Rım Papasy Lev XIV Túrkııany qaqtyǵystarǵa toly álemde «turaqtylyq pen dıalog kózi» bolýǵa shaqyrdy. Ol bul málimdemeni beısenbi kúni Ankarada — pontıfık saılanǵannan beri alǵashqy sheteldik sapary kezinde jasady.

Túrkııa astanasynda Rım-katolık shirkeýiniń basshysyn áskerı qurmet qaraýyly qarsy alyp, sodan keıin prezıdent Rejep Taııp Erdoǵan qabyldady.

Saraı kesheniniń kitaphanasynda onymen jáne eldiń dıplomatııalyq korpýsynyń ókilderimen sóılesken Rım Papasy Túrkııanyń Shyǵys pen Batys, dinder men mádenıetter arasyndaǵy kópir retindegi tarıhı rólin joǵary baǵalady. 

— Ádil jáne uzaq merzimdi beıbitshilik úshin Túrkııa halyqtar arasyndaǵy turaqtylyq pen jaqyndasýdyń kózi bolsyn, — dedi ol.

Ol sondaı-aq «Búgin bizge dıalogty qoldaıtyn jáne ony berik erik-jigermen jáne shydamdylyqpen júzege asyratyn adamdar burynǵydan da qajet» dep atap ótti.
Rım Papasy bul qaqtyǵystardy naqty ataǵan joq, biraq ol óziniń aldyndaǵy Frantsısktiń «álem qazirdiń ózinde bólshektep júrgizilip otyrǵan úshinshi dúnıejúzilik soǵysty bastan keshirip jatyr» dep ókinish bildirgenin, munda resýrstar ashtyqpen, kedeılikpen nemese shyǵarmashylyqpen kúresýge emes, qarý-jaraqqa jumsalyp jatqany týraly sózderin aıtty.

— Eki dúnıejúzilik soǵystan keıin biz qazir jahandyq deńgeıdegi qaqtyǵystardyń shıelenisken kezeńinde turmyz. Biz buǵan boı aldyrmaýymyz kerek. Adamzattyń bolashaǵyna qater tónip tur, — dedi ol.

Lev XIV–VI Pavel, II Ioann Pavel, XIV Benedıkt jáne Rım Papasy Frantsıskten keıin Túrkııaǵa kelgen besinshi pontıfık. Onyń sapary Taıaý Shyǵystaǵy jaǵdaı erekshe shıelenisken kezeńde, Gazadaǵy atysty toqtatý álsiz kúıinde júrip jatqan jáne Izraıl jaqynda Beırýt pen Ońtústik Lıvanǵa shabýyl jasaǵan kezde jasalyp otyr.

Alaıda onyń Túrkııaǵa saparynyń basty sebebi pravoslavıe-katolık dıalogy tarıhyndaǵy mańyzdy kún — hrıstıan dini tarıhyndaǵy alǵashqy ekýmenıkalyq sobor — Nıkeı soborynyń 1700 jyldyǵyn merekeleý boldy. B.z. 325 jyly bul sobor Nıkeılik senim sımvolynyń alǵashqy nusqasyn ázirledi, ony mıllıondaǵan hrıstıandar áli kúnge deıin ár jeksenbi saıyn oqıdy.

Buǵan deıin Rım Papasy shetelge saparyn Túrkııadan bastaıtynyn jazǵan bolatynbyz.