Túrkııa tsıfrlyq lıra shyǵarýǵa daıyndalyp jatyr
ASTANA. KAZINFORM – Túrkııa ulttyq tsıfrlyq valıýta – tsıfrlyq túrik lırasyn engizý jolynda sheshýshi qadam jasap jatyr, dep habarlaıdy Kazinform menshikti tilshisi.
«Túrkııa prezıdentiniń 2026 jylǵa arnalǵan baǵdarlamasyndaǵy» málimetterge sáıkes, tsıfrlyq lırany ázirleý, synaqtan ótkizý jáne qarjy júıesine biriktirý jumystary aldaǵy jyly belsendi túrde jalǵasady.
Túrkııa Ortalyq banki basqaratyn joba tsıfrlyq valıýtany tehnıkalyq turǵydan jetildirýdi ǵana emes, sonymen qatar ony resmı túrde iske qosý jáne paıdalaný úshin qajetti zańnamalyq bazany daıyndaýdy da qamtıtyn jańa kezeńge aıaq basyp otyr.
Basty baǵyttardyń biri Ortalyq bank tsıfrlyq valıýtanyń eldiń ekonomıkasy men qarjy sektoryna yqpalyn baǵalaý úshin synaq uıymdastyrmaq. Sonymen qatar qarjy deldaldarynyń tsıfrlyq lıra júıesine ıntegratsııalanýy qamtamasyz etilip, jobanyń ekojúıesine perspektıvaly sanalatyn ınnovatsııalyq, tehnologııalyq sheshimder engiziledi.
Buǵan qosa Túrkııanyń basty qarjy retteýshisi tsıfrlyq aktıvtermen jáne tokendelgen qundy qaǵazdarmen operatsııalar úshin tehnıkalyq talaptardy taldaý jáne anyqtaýmen aınalysady. Mundaı aktıvtermen esep aıyrysý kezinde tsıfrlyq lırany paıdalaný boıynsha pılottyq jobalar ótkizý josparlanyp otyr.
Bıylǵy jyldyń qyrkúıek aıynda Túrkııanyń Ortalyq banki bankterdi, qarjy-tehnologııalyq kompanııalardy jáne tehnologııalyq sheshimderdi jetkizýshilerdi tsıfrlyq valıýtany paıdalanýdyń ınnovatsııalyq jaǵdaılaryn ázirleýge shaqyrdy.
Jobanyń birinshi kezeńi týraly buryn jarııalanǵan esepke sáıkes, tsıfrlyq lıra Túrkııanyń bolashaq qarjy-tehnologııalyq ekojúıesiniń negizgi elementi retinde qarastyrylyp otyr. Qazirgi kezde jobanyń barlyq aspektilerin damytýǵa baǵyttalǵan ekinshi kezeń iske asyrylyp jatyr.
Osylaısha, 2026 jyl tsıfrlyq lıra úshin betburys kezeńi bolady, dál sol kezde Túrkııa ulttyq tsıfrlyq valıýtasyn testileýden praktıkalyq engizýge kóshýdi josparlap otyr.
Buǵan deıin Túrkııanyń ulttyq valıýtasy 2010 jyldan beri óz qunynyń shamamen 97%-yn joǵaltqanyn jazǵan bolatynbyz. Bul mıllıondaǵan azamattyń jınaqtary joıylǵanyn bildiredi.