Túrkııa Türksat 6A ulttyq baılanys serigin ushyrdy

ASTANA. KAZINFORM – Túrkııa ǵaryshtyq tehnologııalaryn damytýda tarıhı qadam jasady. Tuńǵysh otandyq baılanys serigi Türksat 6A paıdalanýǵa berilip jatyr, dep habarlaıdy Kazinform agenttiginiń menshikti tilshisi. 

Osy oqıǵaǵa arnalǵan saltanatty is-shara el prezıdenti Redjep Taııp Erdoǵannyń qatysýymen ótip jatyr. 

Túrkııanyń Kólik jáne ınfraqurylym mınıstri Abdýlkadır Ýraloglý habarlaǵandaı, Türksat 6A ushyrylymy túrik spýtnıkteriniń qazirgi 3,5 mlrd adamnan 5 mlrd-qa deıin qamtylýyn aıtarlyqtaı keńeıtýge múmkindik beredi. Jańa apparat baılanys qyzmetin kem degende 15 jyl kórsetedi. 

Mınıstrdiń aıtýynsha, Türksat 6A jobasy – 20 jylǵa jýyq júrgizilgen jumystyń nátıjesi jáne ony júzege asyrý Túrkııany baılanys spýtnıkterin ózdiginen shyǵarýǵa qabiletti álemniń 11 eliniń qataryna qosqan. Lokalızatsııa deńgeıi – erekshe maqtanysh. 100 quramdas bóliktiń 84-i Túrkııanyń ózinde jasalǵan, al jergilikti bólshekterdiń úlesi 80 paıyzdan asty. 

Türksat 6A 1994 jyly Türksat 1B ushyrýymen bastalǵan túrik spýtnıktik baǵdarlamanyń tarıhyn jalǵastyrdy. Kelesi jyldary Türksat 1C (1996) jáne Türksat 2A (2001) orbıtaǵa shyǵyp, ulttyq spýtnıktik baılanys ınfraqurylymynyń negizin qalady. 

Ýraloglý atap ótkendeı, Türksat 6A ushyrylymy – tek tehnologııalyq jetistik emes, Túrkııanyń ǵaryshtaǵy qatysýyn kúsheıtýge jáne negizgi sektorlarda sheteldik tehnologııalarǵa táýeldilikti azaıtýǵa baǵyttalǵan strategııalyq qadam. 

– Türksat 6A túrik ǵarysh ındýstrııasy men tehnologııalyq egemendiginiń jańa dáýiriniń sımvolyna aınalady, - dedi túrik mınıstri. 

Buǵan deıin SpaceX AQSh-tyń barlaý qyzmetine arnalǵan spýtnıkterdi ǵaryshqa ushyrǵanyn jazǵan bolatynbyz.