Túrkııa tórinde «Saryarqa», «Serper», «Mahambet» kúıleri oryndaldy

ATYRAÝ. QazAqparat - Túrkııanyń Ankara qalasynda «Dına Nurpeıisova atyndaǵy halyqtyq mýzyka akademııasy» Atyraý mýzyka kolledjiniń halyq aspaptar orkestriniń Astananyń 20 jyldyǵyna arnalǵan kontserti ótti, dep habarlaıdy QazAqparat tilshisi.

Kontsert Qazaqstannyń Túrkııadaǵy elshiliginiń qoldaý kórsetýimen uıymdastyryldy. Mədenı shara TRT Avaz telearnasynda tikeleı efırden kórsetildi. Jıynǵa QR Túrkııadaǵy elshisi Abzal Saparbekuly jáne TR prezıdentiniń bas keńesshisi ıAlchyn Topchý qatysty. 

Erjan Qıtarovtyń jetekshilik etetin kolledj orkestri álemdik jaýharlarmen qatar, qazaq mýzyka álemindegi orny erekshe Qurmanǵazy, Dına Nurpeıisova, Seıilhan Qısanov jáne basqa da kompozıtorlardyń týyndylaryn oryndady.

«Bul kún qazaqtyń ulttyq óneri ulyqtalǵan kún boldy. Jas ónerpazdardyń ónerlerine tánti boldyq. Qazaqtyń kúmbirlegen kúıi men qalyqtaǵan ánderine tamsanbaǵan kórermen joq. Ásirese, kúı tartys, jastardyń qazaq, túrik ánderinen oryndaǵan poppýrı áserli boldy. «Saryarqa», «Serper», «Mahambet» kúılerin orkestr keremet oryndady. Bundaı sharalar baýyrlas elder arasyndaǵy mádenı-rýhanı baılanystardy nyǵaıtatyny sózsiz», - dedi kontsertti tamashalaǵan almatylyq Áıkerim Álimjan.