Túrkııa tórinde Qazaqstan Táýelsizdiginiń 30 jyldyǵyna arnalǵan kontsert ótti

ANKARA. QazAqparat – Senbi kúni Túrkııa Respýblıkasy Mádenıet mınıstrliginiń Prezıdenttik sımfonııalyq orkestriniń kontserttik zalynda Eýrazııa sımfonııalyq orkestriniń Qazaqstan Respýblıkasy Táýelsizdiginiń 30 jyldyǵyna arnalǵan kontserti ótti. Sharany Qazaqstannyń Túrkııadaǵy Elshiligi uıymdastyrdy, dep habarlaıdy QazAqparat.

QR Elshiliginen málim etkendeı, kontsertte Qazaqstannyń halyq ártisi, eńbek sińirgen qaıratkeri, Qazaq Ulttyq óner ýnıversıtetiniń rektory, esimi álemge tanymal skrıpkashy Aıman Musaqojaeva óner kórsetti. Sonymen qatar, opera ánshisi Talǵat Musabaev, daryndy kompozıtor Rahat-bı Ábdisaǵyn óz ónerlerin tyńdarmanǵa pash etti. Kontsert dırıjeri – Aıdar Torybaev.

Sondaı-aq qazaqtyń qara dombyrasymen halqymyzdyń dástúrli kúılerin oryndaǵan «Shabyt» dombyrashylar orkestri kórermendi ónerlerimen tánti etti.

Al Eýrazııa sımfonııalyq orkestri otandyq jáne álemdik mýzyka klassıkalaryn oryndap kópshiliktiń ystyq yqylasyna bólendi.

Keshke Qazaqstan Respýblıkasynyń Túrkııadaǵy Elshisi Abzal Saparbekuly, Halyqaralyq TÚRKSOI uıymy Bas hatshysy Dúısen Qaseıinov jáne Ankaradaǵy dıplomatııalyq mıssııa basshylary, dıplomattar, Túrkııa memlekettik organdar basshylary, ýnıversıtet oqytýshylary, zııaly qaýym, dıaspora, Ankarada bilim alyp jatqan stýdentter men BAQ ókilderi qatysty.

Kontserttiń ashylý saltanatynda sóz sóılegen Elshi Abzal Saparbekuly: «Ǵalamǵa ortaq til – mýzyka men óner qashanda adamdardyń basyn qosqan. Osy turǵyda óner Qazaqstan-Túrkııa qarym-qatynasyndaǵy basym baǵyttardyń biri bolyp tabylady. Shyndyǵynda, bizdiń halyqtarymyz ejelden ortaq qundylyqtardy biriktirip keledi. Qazaqtyń ulttyq mýzykalyq aspaby dombyranyń Túrkııada erekshe yqylaspen tyńdalýy baýyrlastyǵymyzdy odan ári nyǵaıtýda», - dedi.