Túrkııa tarapynan Qazaqstanmen vızasyz rejimdi toqtatatyndyǵy jaıly resmı eskertý túsken joq - QR SІM
ASTANA. QazAqparat - QR Syrtqy ister mınıstrligi Túrkııa tarabynan Qazaqstanmen vızasyz rejimdi toqtatatyndyǵy jaıly resmı eskertý alǵan joq. Bul jaıynda QazAqparat tilshisine QR SІM baspasóz qyzmetiniń jetekshisi Ánýar Jaınaqov málim etti.
«Qazirgi ýaqytta biz túrik tarapynan Qazaqstan azamattary úshin vızasyz rejimdi toqtatý nıeti týraly eshqandaı resmı eskertý alǵan joqpyz», - dedi ol.
Aıta keterligi, Astanadaǵy Túrkııa Elshiliginen de QazAqparat tilshisine túrik elinen ázirshe eshqandaı resmı aqparat kelip túspegendigin málimdedi.
«Elshi myrza Túrkııadan resmı aqparattyń kelip túspegendigin aıtty. Aqparat kelip túsken bette biz habaryn beremiz», - dedi Elshilik qyzmetkeri telefon arqyly.
Túrkııanyń 89 elmen, onyń ishinde Qazaqstanmen de vızalyq rejimdi qalpyna keltiretindigi týraly aqparat haberizmir.com saıtynda jarııalanǵan bolatyn.
Atalǵan aqparatqa qaraǵanda, mundaı sheshim Túrkııa men Eýropalyq odaq arasynda vızalyq rejimdi jeńildetý jáne readmıssııa týraly kelisimniń qol qoıylýyna baılanysty qabyldanǵan.
