Túrkııa tamyz aıynda Ázerbaıjan gazyn Sırııaǵa eksporttaýdy bastaıdy

ASTANA. KAZINFORM – Ázerbaıjan gazy Aleppo qalasyna Túrkııanyń Kılıs provıntsııasy arqyly jetkizilip, Sırııanyń soltústigin elektr qýatymen qamtamasyz etýge baǵyttalady. Bul týraly Túrkııanyń energetıka jáne tabıǵı resýrstar mınıstri Alparslan Baıraktar málimdedi.

Mınıstrdiń aıtýynsha, gazdyń alǵashqy partııasy Sırııaǵa 2 tamyz kúni jóneltiledi. Jetkizý jumystary mamyr aıynda qurylysy aıaqtalǵan Kılıs pen Aleppony jalǵaıtyn gaz qubyry arqyly júzege asady.

— Senbi kúni biz Kılıs arqyly Aleppoǵa Ázerbaıjan gazyn eksporttaýdy bastaımyz, — dedi Baıraktar Ankarada Anadolu agenttiginiń redaktsııalyq kezdesýinde sóılegen sózinde.

Joba aıasynda 6 mıllıon tekshe metr gaz paıdalaný josparlanyp otyr. Bul kólem 1200 megavattqa deıin elektr energııasyn óndirýge múmkindik beredi. Gaz Túrkııa men Ázerbaıjan arasyndaǵy svop tetigi arqyly, Qatardyń qarjylyq qatysýymen jetkiziledi.

Bastapqy kezeńde bul jetkizilimder Sırııanyń soltústigindegi elektrmen qamtýdy táýligine qazirgi 3-4 saǵattan 10 saǵatqa deıin arttyrýǵa múmkindik beredi.

Mınıstrdiń málimetinshe, Túrkııa qazirdiń ózinde Sırııanyń soltústigine elektr energııasyn eksporttap otyr jáne qoldanystaǵy elektr jelileri arqyly jetkizilip jatqan qýatty 280 megavattqa deıin ulǵaıtýdy josparlap otyr.

— Biz sondaı-aq qýattylyǵy 500 megavatt bolatyn Bıdjerık – Aleppo jelisin qalpyna keltirý jumystaryn júrgizip jatyrmyz. Bul jeliniń Túrkııa aýmaǵyndaǵy bóligi saqtalǵan, al Sırııa jaǵyndaǵy bóligi jóndeýdi qajet etedi. Qalpyna keltirilgennen keıin biz 900 megavattqa deıin energııa eksporttaı alamyz. Bul shamamen 1,6 mıllıon úı sharýashylyǵynyń qajettiligin óteıdi, — dedi Baıraktar.

Ol sondaı-aq birqatar halyqaralyq sanktsııalardyń jeńildeýi osyndaı jobalardy júzege asyrýǵa jol ashyp, Sırııadaǵy jaǵdaıdy turaqtandyrýǵa, sonyń ishinde bosqyndardyń oralýyna yqpal etetinin atap ótti.

Aıta keteıik, Túrkııadaǵy Aqkýıý atom elektr stantsııasynyń birinshi reaktory 2026 jyly iske qosylady.