Túrkııa taǵy eki atom elektr stantsııasyn salýdy josparlap otyr
ASTANA. KAZINFORM — Túrkııadaǵy «Akkýıý» atom elektr stantsııasynyń alǵashqy reaktorynda 2026 jyldyń sońyna deıin ıadrolyq tizbekti reaktsııa iske qosylmaq.
Túrkııanyń Daily Sabah basylymynyń habarlaýynsha, bul týraly Reseıdiń «Rosatom» memlekettik korporatsııasynyń basshysy Alekseı Lıhachev málimdedi.
«Akkýıý» AES Jerorta teńizi jaǵalaýyndaǵy Mersın provıntsııasynda salynyp jatyr. Jobanyń quny 20 mlrd dollarǵa baǵalanady. Stantsııa árqaısysynyń qýaty 1 200 MVt bolatyn tórt energobloktan turady. Barlyq blok tolyq qýatyna shyqqan kezde Túrkııanyń elektr energııasyna degen qajettiliginiń shamamen 10 paıyzyn qamtamasyz etedi.
«Akkýıýdan» bólek, Túrkııa bıligi taǵy eki AES salýdy josparlap otyr. Olardyń biri Qara teńiz jaǵalaýyndaǵy Sınop qalasynda, ekinshisi Frakııa óńirinde boı kótermek. Basylymnyń jazýynsha, bul jobalar boıynsha Kanada, Qytaı, Reseı jáne Ońtústik Koreıamen kelissózder jalǵasyp jatyr.
Túrkııa Reseımen energetıka salasyndaǵy yntymaqtastyǵyn nyǵaıtýǵa nıetti. Energetıka jáne tabıǵı resýrstar mınıstri Alparslan Baıraktar Máskeýde «Novatek» kompanııasynyń basshylyǵymen kezdesip, suıytylǵan tabıǵı gaz jetkizý baǵytyndaǵy áriptestikti damytý múmkindikterin talqylady.
Túrkııa energetıka kózderin ártaraptandyrýdy jalǵastyryp, energııa jetkiziliminiń qaýipsizdigin nyǵaıtýdy kózdep otyr. Mınıstrdiń aıtýynsha, ótken jyly elde shamamen 59 mlrd tekshe metr tabıǵı gaz tutynylǵan, onyń basym bóligi ımport arqyly qamtamasyz etiledi. Keıingi eki jylda Túrkııa birqatar iri halyqaralyq óndirýshimen suıytylǵan tabıǵı gaz jetkizý boıynsha uzaqmerzimdi kelisimsharttar jasasty.
Buǵan deıin Túrkııa men AQSh shaǵyn modýldik reaktorlar boıynsha kelisimge qol qoıǵanyn jazǵan edik.
