Túrkııa tabıǵı gaz ımportyn qysqartty
ASTANA. KAZINFORM — Sońǵy ýaqytta Túrkııaǵa gaz jetkizý kólemi jyldyq mánde 21,7%-ǵa tómendedi, dep habarlaıdy Kazinform agenttiginiń Ankaradaǵy menshikti tilshisi Daily Sabah basylymyna silteme jasap.
Túrkııanyń Energııa naryǵyn retteý basqarmasynyń (EPDK) málimetinshe, shildede tabıǵı gaz ımporty shamamen 3,06 mlrd tekshe metrdi qurady. Bul ótken jyldyń sáıkes aıyndaǵy kórsetkishten 21,7%-ǵa az. Onyń ishinde qubyr arqyly jetkizilgen gaz kólemi 2,87 mlrd tekshe metr, al suıytylǵan tabıǵı gaz kólemi 194,05 mln tekshe metr boldy.
Qubyr arqyly gaz jetkizýdegi eń iri úles Ázerbaıjanǵa tıesili – 1 mlrd tekshe metrden astam. Odan keıin Reseı – 948,49 mln tekshe metr jáne Iran – 919,33 mln tekshe metr. Túrkııa suıytylǵan tabıǵı gazdyń barlyq kólemin Aljırden alǵan.
Tabıǵı gaz tutyný kólemi de 25,2%-ǵa tómendep, 2,65 mlrd tekshe metrdi qurady. Al shilde aıynyń sońynda gaz qory 5,64 mlrd tekshe metrge jetip, bir jylda 30,5%-ǵa ósti.
Shildede munaı jáne munaı ónimderiniń ımporty shamamen 4,52 mln tonnany qurap, jyldyq mánde 6,9%-ǵa azaıdy. Bul rette shıki munaı ımporty 0,32%-ǵa ósip, 2,93 mln tonnaǵa jetti.
Munaı men munaı ónimderiniń negizgi jetkizýshisi Reseı bolyp qaldy – 1,66 mln tonna. Odan keıin Irak – 653,5 myń tonna jáne Qazaqstan – 508 myń tonna. Qazaqstannyń úlesi jalpy ımport kóleminiń 11,24%-yn qurady.
Buǵan deıin Túrkııa energetıka salasyndaǵy halyqaralyq yntymaqtastyqty kúsheıtip jatqany týraly jazǵan bolatynbyz.
Aıta ketelik Túrkııa Aıǵa ushatyn apparatyn ázirleýdi aıaqtady.
