Túrkııa tabıǵı gaz ımportyn 21,7%-ǵa qysqartty
ASTANA. KAZINFORM- Túrkııaǵa tabıǵı gaz jetkizý kólemi jyldyq mánde 21,7%-ǵa qysqardy, dep habarlaıdy Kazinform agenttiginiń Ankaradaǵy menshikti tilshisi Daily Sabah basylymyna silteme jasap.
Túrkııanyń Energııa naryǵyn retteý basqarmasynyń (EPDK) málimetinshe, shildede elge shamamen 3,06 mlrd tekshe metr tabıǵı gaz ımporttalǵan. Bul byltyrǵy osy aıdaǵy kórsetkishten 21,7%-ǵa az. Onyń 2,87 mlrd tekshe metri qubyr arqyly jetkiziletin gazǵa, 194,05 mln tekshe metri suıytylǵan tabıǵı gazǵa (STG) tıesili.
Qubyr arqyly gaz jetkizgen negizgi el Ázerbaıjan boldy – 1 mlrd tekshe metrden astam. Odan keıin Reseı – 948,49 mln tekshe metr jáne Iran – 919,33 mln tekshe metr. Túrkııa STG-nyń barlyq kólemin Aljırden ımporttady.
Tabıǵı gaz tutyný kólemi de 25,2%-ǵa tómendep, 2,65 mlrd tekshe metrdi qurady. Sonymen qatar shilde aıynyń sońynda gaz qory 5,64 mlrd tekshe metrge jetip, jyldyq mánde 30,5%-ǵa artty.
Shildede munaı men munaı ónimderiniń ımporty shamamen 4,52 mln tonnany qurady. Bul byltyrǵy osy kezeńmen salystyrǵanda 6,9%-ǵa az. Al shıki munaı ımporty 0,32%-ǵa azdap ósip, 2,93 mln tonnaǵa jetti.
Munaı men munaı ónimderin negizgi jetkizýshi burynǵydaı Reseı boldy. Onyń úlesi 1,66 mln tonnany qurady. Odan keıin Irak – 653,5 myń tonna jáne Qazaqstan – 508 myń tonna kórsetkishimen ornalasty. Qazaqstannyń úlesi jalpy ımport kóleminiń 11,24%-yn qurady.
Buǵan deıin Qazaqstanda energetıka jáne turǵyn úı-kommýnaldyq sharýashylyq salalaryn jańǵyrtýǵa 839 mlrd teńge baǵyttalatyny habarlanǵan bolatyn.
Osyǵan deıin elimizde jasyl energetıkany damytý tujyrymdamasy ázirlenip jatqany týraly jazdyq.
