Túrkııa tabıǵı apatpen kúresý úshin jańa vedomstvo qurady
ASTANA. KAZINFORM – Túrkııa bıligi kezekti memlekettik organdy qurýǵa kiristi, dep habarlaıdy Kazinform agenttiginiń menshikti tilshisi.
Belgili bolǵandaı, jańa tabıǵı apattardyń aldyn alý mınıstrligi tabıǵı apattyń aldyn alý jáne joıý jónindegi kúsh-jigerdi úılestirýmen aınalysady.
Bastama el únemi zardap shegetin, jıi bolatyn tabıǵı apattarmen kúreste tıimdilikti arttyrýǵa baǵyttalǵan. Aldyn ala aqparatqa sáıkes, jańa mınıstrliktiń qaramaǵyna qazir mýnıtsıpalıtetterdiń qaramaǵyndaǵy órt sóndirý qyzmetterin, sondaı-aq tótenshe jaǵdaılarǵa den qoıýǵa qatysatyn basqa mekemelerdi berý josparlanyp otyr.
Jańa qurylym sonymen qatar ǵımarattardyń jer silkinisi, sý tasqyny jáne órt sııaqty tabıǵı apattarǵa tózimdiligin arttyrý maqsatynda qurylys normalary men standarttarynyń saqtalýyn baqylaý ókilettigine ıe bolady.
Mınıstrliktiń qurylýy ásirese eldegi órt qaýipti bolyp turǵan jaǵdaıda ózekti bolyp otyr. Antalıa men Mýgla provıntsııalarynda úlken aýmaqtardy sharpyǵan jappaı orman órti qaıtadan bastaldy.
Jergilikti bıliktiń málimetinshe, Alanıa (Antalıa) jáne Mılas (Mýgla) aýdandarynda órt bolǵan. Túnde bastalǵan órt qatty jeldiń áserinen tez tarady. Bul jerde orman sharýashylyǵy basqarmasynyń, Túrkııa Úkimetiniń tótenshe jaǵdaılardyń aldyn alý jáne joıý basqarmasynyń (AFAD) brıgadalary, mýnıtsıpaldy órt sóndirý bólimderi, jandarmerııa jáne eriktiler jumys isteıdi. Jergilikti turǵyndar da órtti sóndirýge belsendi túrde kómektesip jatyr.
Shuǵyl qyzmetter qaýipti aımaqtaǵy eldi mekenderden halyqty evakýatsııalap jatyr.